Засгийн газрын 2025 оны аравдугаар сарын 22-ны ээлжит хуралдаанаар Улаанбаатар хотын гэр хорооллын дахин төлөвлөлт болон “Ногоон нуур 1008 айл” орон сууцны хорооллын ашиглалтад оруулах асуудлыг хэлэлцэж, холбогдох шийдвэрийг гаргалаа.
Бүгд Найрамдах Хятад Ард Улсын буцалтгүй тусламжаар хэрэгжсэн “Ногоон нуур орчмын орон сууцны хороолол барих төсөл” 2022–2025 онд амжилттай хэрэгжиж дуусжээ. Энэхүү төсөл нь Сүхбаатар дүүргийн IX хорооны нутаг дэвсгэрт байрлах гэр хорооллын айлуудын газрыг чөлөөлж, орон сууцны цогцолбор барих зорилготой байсан юм.
Төслийн хүрээнд 4.2 га талбайд төмөр бетон хийцтэй, 21 давхар 8 блок бүхий орон сууцны барилгууд, нэгдсэн хоёр гражтай 271 далд зогсоол, дотоод авто зам, ил зогсоол, ногоон байгууламж, гадна инженерийн шугам сүлжээг иж бүрнээр барьж байгуулсан байна.
Иргэдийг орон сууцанд хамруулах журам
Засгийн газраас гаргасан шийдвэрийн дагуу, гэр хорооллын дахин төлөвлөлтөд хамрагдсан иргэдийг газраа орон сууцаар солих нөхцөлтэйгөөр “Ногоон нуур 1008 айл”-ын орон сууцанд хамруулах зохион байгуулалтыг Хот байгуулалт, барилга, орон сууцжуулалтын сайд Э.Бат-Амгаланд даалгав.
- 756 айл өрх – газар чөлөөлсөн иргэдийг хамруулна
- 252 айл өрх – түрээслээд өмчлөх нөхцөлөөр ашиглана
Мөн зорилтот бүлгийн иргэдийг тус хорооллын түрээсийн байрнуудад сонгон шалгаруулж, түрээсийн үнийг зах зээлийн үнэтэй уялдуулан шинэчлэн тогтоох ажлыг зохион байгуулахаар боллоо.
Төслийн ерөнхий гүйцэтгэгчээр “Хятад Улсын Хоёр дахь металлурги групп” ХХК, туслан гүйцэтгэгчээр Монголын 20 гаруй компани оролцсон байна.
“Ногоон нуур 1008 айл” төсөл нь гэр хорооллын дахин төлөвлөлтийн хүрээнд иргэдийг тохилог, орчин үеийн орон сууцанд хамруулах чухал алхам болж, нийслэлийн агаар, хөрсний бохирдлыг бууруулах, амьдрах орчны чанарыг сайжруулахад чухал хувь нэмэр оруулна гэж үзэж байна.
