Гэр бүлийн хүчирхийллийн улмаас гэрлэлтээ цуцлуулах хүсэлт гаргасан тохиолдолд шүүхээс гэрлэгчдийг эвлэрүүлэх ямар нэгэн арга хэмжээ авдаггүй байна.
Энд бид энэхүү хуулийн хэрэгжилтийг бодит жишээтэй харуулсан мэдээллийг хүргэж байна.
Шүүхийн шийдвэрийн мэдээлэл
- Огноо, дугаар: 2025 оны 6 дугаар сарын 26, №307/ШШ2025/01134
- Төлөв: Хүчин төгөлдөр болсон.
- Санамж: Энэхүү тойм нь шүүхийн бүрэн шийдвэрийг орлохгүй, зөвхөн олон нийтэд ойлгомжтойгоор мэдээлэл хүргэх зорилготой.
Нэхэмжлэлийн талаар
Нэхэмжлэгч Т нь хариуцагч Ө-д холбогдуулан гэрлэлт цуцлуулах, хүүхдийн асрамж тогтоох, тэтгэлэг гаргуулах хүсэлтээ шүүхэд гаргасан. Нэхэмжлэлийн үндэслэлээ тэрээр дараах байдлаар тайлбарлажээ:
“…Нөхөр Ө нь байнга архи уудаг бөгөөд архи уухаараа догшин ширүүн ааштай болж, цохиж нүддэг болсон. Зодож цохихоороо араатан шиг гарт таарсан мод, чулуу юугаар ч хамаагүй цохиж нүддэг. Ө нь 2017 онд намайг зодож, миний уруулыг сэтэлж, үүдэн шүдийг маань унагаасан. Тухайн үед надад цагдаа дуудах боломж олгоогүй. Гэрээсээ ч гаргахгүй, гар утсыг маань хураагаад авчихсан. Би урууландаа 8 оёдол тавиулж, одоо болтол үүдэн шүдээ хийлгэж чадаагүй явж байгаа. Иймд цаашид хамтран амьдрах боломжгүй.”
Хуулийн үндэслэл
Гэр бүлийн тухай хуулийн 14 дүгээр зүйлийн 14.1-д:
“…гэрлэгчдийн харилцан тохиролцсон буюу тэдний хэн нэгний, эсхүл иргэний эрх зүйн эрхийн бүрэн чадамжгүй гэж тооцогдсон эхнэр, нөхрийн асран хамгаалагчийн нэхэмжлэлийн дагуу гэрлэлт цуцлах асуудлыг шүүх шийдвэрлэнэ. Гэрлэлт цуцлах асуудлаар эвлэрүүлэн зуучлах ажиллагаа явуулах боломжгүйгээс бусад тохиолдолд эвлэрүүлэн зуучлах ажиллагаа явагдсаны дараа шүүх иргэний хэрэг үүсгэнэ.”
гэж заасан байдаг.
Түүнчлэн, Гэр бүлийн тухай хуулийн 14 дүгээр зүйлийн 14.4-т:
“Гэрлэгчдийн хэн нэгний байнгын хүчирхийлэл, дарамтаас болж гэр бүлийн гишүүдийн амь нас, эрүүл мэнд болон хүүхдийн хүмүүжилд ноцтой хохирол учирч болзошгүй, эсхүл учирсан нь тогтоогдсон байх”
тохиолдолд эвлэрүүлэн зуучлах ажиллагаа явуулах боломжгүй гэж заасан.
Шүүхийн шийдвэр
Нэхэмжлэгч Т нь хариуцагч Ө-ийн байнгын хүчирхийлэл, дарамтанд өртөж, зодуулсны улмаас уруулдаа 8 оёдол тавиулж, үүдэн шүдээ алдсан зэрэг ноцтой гэмтэл авсан баримтыг гэрэл зургийн хамт нэхэмжлэлдээ хавсаргасан. Шүүх үүнийг үндэслэн эвлэрүүлэн зуучлах боломжгүй гэж дүгнэж, иргэний хэрэг үүсгэн, хянан шийдвэрлэх ажиллагаа явуулжээ.
Шүүх хуралдааны талуудын тайлбар, цугларсан нотлох баримтуудыг үндэслэн хариуцагч Ө-ийн байнгын архидалт, гэр бүлийн хүчирхийлэл үйлдэгч байдал нь гэрлэлт цуцлах үндэслэл болохыг тогтоожээ. Иймд Гэр бүлийн тухай хуулийн 14.4, Иргэний хэрэг шүүхэд хянан шийдвэрлэх тухай хуулийн 132.4-т заасны дагуу:
- Т ба Ө-ийн гэрлэлтийг цуцалсан.
- Насанд хүрээгүй охин А, хүү А нарыг нэхэмжлэгч Т-ийн асрамжинд үлдээсэн.
- Эцэг Ө-өөс хүүхдийн тэтгэлэг гаргуулж, тэжээн тэтгүүлэхээр шийдвэрлэсэн.
Тоймыг бэлтгэсэн
Дархан-Уул аймаг дахь сум дундын анхан шатны шүүхийн шүүгч Г.Энхцэцэг.
Санамж: Энэхүү тойм нь шүүхийн бүрэн шийдвэрийг орлохгүй бөгөөд зөвхөн олон нийтэд ойлгомжтойгоор мэдээлэл хүргэх зорилготой юм.
SEO Title: Гэр Бүлийн Хүчирхийллээс Болж Гэрлэлт Цуцлав
Meta Description: Гэр бүлийн хүчирхийллийн улмаас гэрлэлт цуцлуулах өргөдөл гаргасан Т-ийн хэргийг шүүх эвлэрүүлэхгүйгээр шийдвэрлэж, гэрлэлтийг цуцаллаа.
