Канадын Альберта мужийн Кананаскис амралтын бүсэд 6-р сарын 15–17-нд болж буй “Их долоон”-гийн (G7) дээд хэмжээний уулзалтын хүрээнд төлөвлөгдсөн аяллын хөтөлбөрийг цуцалсан талаар Bild сонин мэдээлжээ.
Анхнаасаа уулзалтын албан ёсны уулзалтын хажуугаар, удирдагчид Скалист нурууны үзэсгэлэнт оргил руу дүүжин замаар аялах хөтөлбөрт хамрагдах байв. Гэвч олон улсын нөхцөл байдал хурцдаж, дэлхий дахинд гарсан хямралын улмаас энэхүү аяллыг хойшлуулсан байна. Bild сонинд онцолсноор, удирдагчдад аялал хийх цаг зав гарахгүй болжээ.
Ням гарагийн орой Германы канцлер Фридрих Мерц Канадын Ерөнхий сайд Марк Карнитэй уулзсан ч ярианы дэлгэрэнгүйг нууцалжээ. Гэсэн ч уг уулзалтын гол сэдэв нь, магадгүй, Израилийн Иранд хийсэн агаарын цохилтын дараах Ойрхи Дорнод дахь хурцадмал байдал байсан байх хэмээн Bild таамагласан байна.
Хэдийгээр G7-ийн энэ удаагийн уулзалт өндөр түвшинд зохион байгуулагдаж байгаа ч, хийсвэр үг ярианаас цаашгүй, тодорхой үр дүн гарахгүй гэсэн хүлээлт давамгайлж байгаа талаар Bild тэмдэглэжээ.
G7 нь Их Британи, Герман, Итали, Канад, АНУ, Франц, Япон зэрэг хөгжингүй ардчилсан долоон улсын бүлэг бөгөөд эдгээр орны удирдагчид жил бүр уулзаж, дэлхийн гол тулгамдсан асуудлыг хэлэлцдэг.
