Ерөнхий сайд Г.Занданшатар ДЦС-III станцын үйл ажиллагаатай газар дээр нь очиж танилцав. Тэрбээр эрчим хүчний салбарт тулгамдаж буй асуудлуудыг онцгойлон авч үзэж буйгаа илэрхийлж, салбарын удирдлагуудад тодорхой үүрэг, хариуцлага оногдууллаа.
Ерөнхий сайд онцолж хэлэхдээ, “Би Ерөнхий сайдаар томилогдсон өдрөөсөө хойш эрчим хүчний салбарт онцгой анхаарал хандуулж байна. ДЦС-III дээр онцгой дэглэм тогтоож, мэргэжлийн хүн болох Н.Тавинбэхийг Засгийн газрын БЭТ-өөр томилсон. Өвөлжилтийн бэлтгэл ажлыг бүх эх үүсвэрүүдэд хангах шаардлага тавьсан” гэв.
Түлхүү анхаарах ажлууд:
- Тосонцэнгэлийн ДЦС-ын II блокийг ашиглалтад оруулах
- Бөөрөлжүүтийн цахилгаан станцын II блокийг энэ онд багтаан нээх
- Эрдэнэбүрэнгийн УЦС-ын барилгын ажлыг VIII–IX сард эхлүүлэх
- 20 жил гацсан Тавдугаар цахилгаан станцын асуудлыг шийдвэрлэх
Тэрбээр “ашиг сонирхлын зөрчлөөс болж олон төсөл гацаанд орсон. Илүүдэл орон тоо их байгаа ч ажлаа хийж буй инженер, техникийн ажилтнууд цомхотголд өртөх ёсгүй” хэмээгээд: “Эрчим хүчний болон дагалдах хуулиудаа боловсруулж, салбарын данхар бүтэц, үр ашиггүй зардлыг танаж, энэ сарын 30-ны дотор Засгийн газарт танилцуул. Гурван сарын дараа шалтаг тоочиж, мөнгө нэхэхийг хүлээж авахгүй. Энэ өвөл хүн ард минь даарах ёсгүй” гэж хатуу анхаарууллаа.
