Улсын Ерөнхий Прокурорын газрын Дотоод аюулгүй байдлын хэлтсийн дарга асан Э.Амарбат болон бусад зургаан хүнийг хамарсан авлигын хэргийн шүүх хуралдаан гурав дахь удаагаа хойшлогдлоо.
Э.Амарбат нь өмнө нь АТГ-ын Мөрдөх байцаах хэлтсийн дарга, УЕП-ын дэргэдэх Мөрдөх байцаах албаны мөрдөн байцаагчаар ажиллаж байсан юм. Түүнийг авлигын хэрэгт сэжиглэн 2024 оны арванхоёрдугаар сард албан тушаалаас нь чөлөөлсөн байдаг.
Түүнчлэн энэ хэрэгт Б.Батсүх, П.Одонтунгалаг, Б.Мандахбаяр, П.Энхтогтох, Ц.Гантулга, Ш.Батхолбоо нар холбогдсон бөгөөд тэднийг Эрүүгийн хуулийн дараах зүйл ангиудаар буруутган прокуророос яллах дүгнэлт үйлдэн шүүхэд шилжүүлсэн. Үүнд:
- 22.5-1 (Авлигын гэмт хэрэг)
- 17.3-2.2
- 21.2-1
- 22.1-2
- 22.4-2
- 10.4-1
- 21.14-2 зэрэг зүйл заалтууд багтжээ.
Шүүх хуралдаан анх 2025 оны 5-р сарын 28-нд Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхэд товлогдсон ч тодорхой шалтгаанаар хойшлогдсон юм. Харин өнөөдөр буюу 2025 оны 6-р сарын 17-ны 09:00 цагт товлогдсон шүүх хуралдаан мөн хойшилсон бөгөөд энэ удаад холбогдогч Ш.Батхолбоогийн эрүүл мэндийн байдал шалтгаан болсон байна.
Шүүх бүрэлдэхүүн хэргийг үргэлжлүүлэн хэлэлцэхээр ирэх 2025 оны 7-р сарын 1-ний өдрийн 10:00 цагт шүүх хурлыг дахин товлолоо.
Ингэснээр Э.Амарбат болон түүний хамтрагч нарт холбогдох авлигын хэргийн шүүх хуралдаан нийт гурав дахь удаагаа хойшлогдож буйг албаныхан мэдээлэв.
