Хятадын мэс засалчид анх удаа генетикийн хувьд өөрчлөгдсөн гахайн уушгийг хүнд амжилттай шилжүүлэн суулгаж, анагаахын түүхэнд шинэ хуудсыг нээлээ.
Энэхүү туршилтыг доктор Жианшин Хэгийн удирдсан баг гүйцэтгэсэн бөгөөд энэ нь донорын эрхтний ноцтой хомсдлыг даван туулах шинэ боломжийг харуулж байна. Туршилтын тухай Nature Medicine мэдээлжээ.
Органдонорын үүдэл нь 6 төрлийн генийн өөрчлөлттэй гахай байсан бөгөөд түүнийг тархины цус алдалтаар нас барсан 39 настай эрэгтэйд шилжүүлсэн байна. Эрхтэн 9 өдрийн турш (216 цаг) амьдралтай хэвээр ажиллаж, өмнө нь хамгийн том саад гэж үзэж байсан “хэт хурдан татгалзалт” хэмээх эрсдэлийг үгүйсгэсэн ач холбогдолтой үйл явдал болсон.
Мэс заслын дараах хүндрэл
Амжилтаас гадна тодорхой асуудлууд гарсан. Операцийн дараах эхний өдөр хүчтэй хаван ажиглагдсан нь шилжүүлэн суулгасан эрхтний эхний үеийн үйл ажиллагааны алдагдалтай төстэй байсан. Мөн гурав болон зургаа дахь өдрүүдэд эсрэг биеэс үүдэлтэй татгалзлын шинж тэмдэг илэрсэн ч ес дэх өдөртөө хэсэгчлэн тогтворжжээ.
Өвчтөнд дархлааны урвалыг бууруулах зорилгоор олон төрлийн эмийн хослолоос бүрдэх эрчимтэй эмчилгээ хийсэн байна.
Ксенотрансплантацийн ирээдүй
Энэхүү судалгаа гахайгаас хүнд уушиг шилжүүлэн суулгах боломжийг нотолсон ч татгалзлын урвал, халдвар зэрэг олон бэрхшээл хэвээр байгаа гэж зохиогчид тэмдэглэжээ. Өргөн хүрээний клиникийн хэрэглээнд нэвтрүүлэхээс өмнө нэмэлт урьдчилсан судалгаа шаардлагатай.
Гэсэн хэдий ч энэ амжилт дэлхий даяар эрхтэн шилжүүлэн суулгалт хүлээж буй сая сая хүнд найдвар төрүүлж, ксенотрансплантацийн ирээдүйн асар их боломжийг харуулж байна.
