Индонезийн нийслэл Жакарта хот дэлхийн хамгийн хүн ам шигүү суурьшсан хотуудын жагсаалтын нэгдүгээр байрыг эзэлжээ.
Mongolnews24.com-ийн мэдээлснээр, энэ тухай Нэгдсэн Үндэстний Байгууллагын (НҮБ) тайланд үндэслэн The Guardian сонин дамжуулсан байна.
Судалгаагаар Жакартад нийт 42 сая хүн амьдардаг гэсэн тоо гарчээ. НҮБ-ын жагсаалтын хоёрдугаар байранд Бангладешийн нийслэл Дакка 37 сая хүн амтайгаар орсон байна. Гуравдугаар байрыг Японы Токио 33 сая хүн амтайгаар эзэлжээ. Мөн Энэтхэгийн Шинэ Дели болон Хятадын Шанхай хотууд шилдэг тавд багтсан байна.
НҮБ хүн амын тоог тооцоолохдоо хот, хөдөө, захын хорооллын хил хязгаарыг тодорхойлсон шинэ аргачлалыг хэрэглэжээ. Шинэ систем нь нэгдсэн хүн ам зүй, газарзүйн орон зайн үзүүлэлтүүд дээр суурилсан бөгөөд үндэсний янз бүрийн шалгуураас хамааралгүй юм.
НҮБ-ын тайланд дурдсанаар, 1950 оноос хойш Дэлхий дээрх хотын оршин суугчдын тоо хоёр дахин нэмэгджээ. Тухайн үед хотуудад 2.5 тэрбум хүн амьдарч байсан бол одоо гарагийн хүн амын бараг тал хувь нь болжээ. Мегаполисуудын тоо 50 жилийн дотор (1975-2025 он) наймаас 33 болж өссөн байна.
