XVII жарны “Сүрээр дарагч” хэмээх гал морь жилийн Сар шинийн баярт зориулсан хүчит бөхийн барилдаан Бөхийн өргөөнд эхэллээ. Энэ жилийн барилдаанд улсын цолтой 66 бөх зодоглож, эхний даваанаас л олны анхаарал татсан уналтууд гарсан байна.
21 жилийн дараа дахин зодоглосон дархан аварга А.Сүхбат нэгийн даваанд Архангай аймгийн Батцэнгэл сумын харьяат залуу бөх А.Энхбаярт өвдөг шороодлоо. Үзэгчдийн анхаарал төвлөрсөн энэ барилдаан ийнхүү сенсаци уналтаар эхэлсэн юм.
Мөн улсын аварга П.Бүрэнтөгс Сүхбаатар аймгийн Баяндэлгэр сумын харьяат сумын заан Ж.Мягмаржавт унасан бол улсын гарди Ө.Бат-Орших сумын заан М.Өсөхбаярт өвдөг шороодов. Түүнчлэн улсын заан Б.Бат-Өлзий сумын заан Д.Мөнхтулгад дийлдсэнээр нэр хүндтэй бөхчүүд эхний даваанд цувран хожигдлоо.
Эхний даваанд унасан нэртэй бөхчүүд:
- Дархан аварга А.Сүхбат — А.Энхбаярт
- Улсын аварга П.Бүрэнтөгс — Ж.Мягмаржавт
- Улсын гарди Ө.Бат-Орших — М.Өсөхбаярт
- Улсын заан Б.Бат-Өлзий — Д.Мөнхтулгад
Сар шинийн баярт зориулсан хүчит бөхийн барилдаан өнөөдөр эхний хоёр даваагаа явуулах бөгөөд маргааш үргэлжилж, түрүү бөх тодрох хуваарьтай байна.
