2025 оны долдугаар сарын 19-нд Хүүхдийн 100 орчимд болсон зодооны хэрэгт УИХ-ын гишүүн асан Ц.Цэрэнпунцагийн хүү Санжаачойпэл, “Эрэл” компанийн Б.Эрдэнэбатын хүү Тэмүүлэн, Лувсандоржийн Алтан-Очир, “Говь” ХК-ийн захирал Б.Амарсайхан нар холбогдсон билээ. Энэ үед Д.Саяннямбуу гэмтэж, эрүүл мэндийн ноцтой асуудалтай болж үлдсэн юм.
Хууль эрх зүйн явц
- Сүхбаатар дүүргийн прокурорын газраас Д.Саяннямбууг өөрөө “хүний биед санаатай хөнгөн хохирол учруулсан” гэх үндэслэлээр Эрүүгийн хуулийн 11.6 дугаар зүйлээр яллагдагчаар татжээ.
- Прокуророос түүнийг хилээр гарахыг хориглох хүсэлт гаргасан ч шүүх өнөөдөр хэлэлцээд энэ саналыг хүлээж аваагүй байна.
Эцгийн байр суурь
Хохирогчийн аав Д.Дашзэвэг шүүх хурлын өмнө хэвлэлийнхэнд байр сууриа илэрхийлжээ. Тэрбээр:
- “Яллагдагчийн ар гэрийнхэн цахим сүлжээнд эрүүл саруул эдгэж байгаа гэж бичсэн. Харин үнэн хэрэгтээ миний хүү эрүүл саруул эдгэрэх боломжгүй гэмтэл авсан” гэв.
- “Солонгост нүүрний хугарсан ясыг хадаж, одоо эдгэрэлт явагдаж байна. 6-8 сарын дараа дахин хагалгаанд орох шаардлагатай. Түүнчлэн тархины цус хуралт, нүдний харааны эмчилгээ хийгдэх ёстой.”
- “Хүүг маань хөнгөн гэмтэл гэж ялласан нь буруу. Зодооны үед таксинаас хүчээр татаж буулгасан ч бий. Энэ асуудлыг цагдаа, прокурор нар үнэн зөвөөр шийдвэрлэнэ гэдэгт итгэж байна.”
- “Хилийн хориг арай хэтэрсэн арга хэмжээ байсан. Гэхдээ энэ хугацаанд хяналтад байх нь зөв. Энэ сарын 15-наас дахин эмчилгээнд явах шаардлагатай байгаа.”
- “Зодуулаад, дээрэлхүүлээд, доромжлуулсны дараа хүн сэтгэл санааны хувьд их өөрчлөгддөг. Хүү маань бусдын адил сургуулиа төгсөөд мэргэжлээрээ ажиллах мөрөөдлөө түр хугацаанд орхиход хүрлээ.”
- “Хүн хийсэн хэргийнхээ хариуцлагыг хүлээж, хор хохирлыг арилгах ёстой. Шударга шийдвэр гаргаасай гэж хүсэж байна. Зодсон хүүхдүүдийн эцэг эхчүүд уучлалт гуйсан, эмчилгээний зардлыг мөн эмнэлэг рүү шилжүүлж байгаа.”
