УИХ-ын дарга Д.Амарбаясгалан өнөөдөр мэдээлэл хийж, улс төрийн нөхцөл байдал болон намрын чуулганы зорилтын талаар ярьсны зэрэгцээ өөрийнхөө улс төрийн шийдвэрийг албан ёсоор зарлалаа.
Тэрбээр эхлээд байнгын ажиллагаатай парламент байгуулагдсаны 35 жилийн ойг тэмдэглэж буйг дурдсан бөгөөд энэ хугацаанд парламент есөн удаагийн сонгуульд оролцож, анх удаа 126 гишүүнтэй, таван намын төлөөлөлтэй болсон гэдгийг онцолсон юм.
Намрын чуулганы чиглэлүүд
Д.Амарбаясгалангийн хэлснээр энэ намрын чуулганаар дараах таван чиглэлд төвлөрнө:
- Төрийн данхар бүтцийг цомхотгох — яам, агентлаг, төрийн болон орон нутгийн өмчит компанийн тоог бууруулах.
- Төрийн процессын дахин инженерчлэл — иргэдэд хүнд суртал учруулдаг үйл явцыг цэгцлэх.
- Хууль тогтоомжийн уялдаа — 350 хууль, 2768 журмыг нийцүүлж, дүрэм журмыг хуулийн хүрээнд нэгтгэх.
- Татварын системийн шинэчлэл — одоогийн төслийг “гоёмсог засвар” гэж дүгнэсэн бөгөөд бодит реформ хийх шаардлагатай гэж үзэж байна.
- Нийгмийн даатгалын шинэчлэл — хувь хэмжээг бууруулах, хуримтлалын нэгдсэн сантай болох асуудлыг чухалчилна.
Түүний байр суурь
Тэрбээр: “Монгол Улс хувь хүн биш, хууль засагладаг улс байх ёстой. Хуулийн дор эрх тэгш амьдардаг байх ёстой. Энэ бол Монголын төрийн үндсэн зорилго байх ёстой” хэмээн онцлов.
МАН-ын даргад нэр дэвшихээ мэдэгдэв
МАН-ын Ерөнхий нарийн бичгийн даргаар найман жил ажилласан туршлага, намын гишүүдийн дэмжлэгт тулгуурлан тэрээр: “МАН-ыг хувь хүний бус хамтын удирдлагын байгууллага хэвээр хадгалахын төлөө ажиллаж ирсэн. Намын гишүүдийн дэмжлэгийг ажиллаж байсан хүний хувьд МАН-ын даргад нэрээ дэвшүүлнэ гэдгээ албан ёсоор мэдэгдэж байна” гэж мэдэгдлээ.
