2026 оны наймдугаар сард Монгол Улсын нийслэл Улаанбаатар хотноо хүн төрөлхтний өмнө тулгараад буй хамгийн том сорилтуудын нэг болох цөлжилттэй тэмцэх асуудлаарх дэлхийн хэмжээний дээд хэмжээний уулзалт болох гэж байна. Энэ бол COP17 буюу Цөлжилттэй тэмцэх тухай НҮБ-ын конвенцын Талуудын 17 дугаар бага хурал юм. Наймдугаар сарын 17-ноос 28-ны өдрүүдэд Үндэсний цэцэрлэгт хүрээлэнд зохион байгуулагдах энэхүү арга хэмжээнд дэлхийн 197 улсын удирдагчид, сайд нар болон олон улсын төлөөлөгчид оролцоно.
10 мянган зочин ба эдийн засгийн боломж
Монгол Улс өөрийн нөөц бололцоондоо тулгуурлан 10,000 орчим гадаадын зочин хүлээн авахаар төлөвлөж байна. Энэ нь зөвхөн улс төрийн арга хэмжээ бус, манай улсын аялал жуулчлал, үйлчилгээний салбарт асар том боломж авчрах юм.
“Ирж буй зочид зардлаа өөрсдөө дааж, худалдан авалт бүр нь дотоодын бизнес эрхлэгчдэд орлого болж үлдэнэ. Такси үйлчилгээ, зочид буудал, ресторан гээд салбар бүр дэлхийн стандартын дагуу үйлчилж, эх орныхоо найрсаг зочломтгой нэр хүндийг бататгах хариуцлагатай үүрэг бидэнд ногдож байна.”
Монгол орны байгаль орчны тулгамдсан асуудлууд
Энэхүү хурлыг Монголд зохион байгуулж байгаа нь тохиолдол биш юм. Манай улс дэлхийн бусад бүс нутгаас илүүтэйгээр уур амьсгалын өөрчлөлтөд өртөж байгааг дараах тоон үзүүлэлтүүд баталж байна:
- Сүүлийн 85 жилийн хугацаанд агаарын дундаж температур 2.5 хэмээр нэмэгдсэн нь дэлхийн дунджаас 3 дахин өндөр үзүүлэлт юм.
- Нийт нутаг дэвсгэрийн 76.9% нь цөлжилтөд өртөж, бэлчээрийн даац 2 дахин багассан.
- Хур тунадасны хэмжээ нутгийн зарим хэсэгт 10-40% хүртэл буурч, мөстлөгийн талбай 50% хүртэл хумигдаад байна.
- Байгаль эхээ нөхөн сэргээхэд шаардлагатай хөрөнгө оруулалтыг татахын тулд манай улс “Газар-Ус-Мод” сэдэвт стратегийг дэлхий нийтэд танилцуулахаар бэлтгэж байна.
Иргэн бүрийн оролцоо ба “Ногоон” ирээдүй
COP17 хурал нь зөвхөн төр засгийн удирдлагуудын уулзалт биш бөгөөд НҮБ-ын стандартын дагуу иргэд цахимаар бүртгүүлэн ажиглагчаар оролцох, үзэл бодлоо илэрхийлэх бүрэн боломжтой юм. Энэ бол монгол хүн бүр эх орныхоо төдийгүй дэлхий нийтийн амьдралын амин чухал асуудалд дуу хоолойгоо өргөх талбар юм. Байгаль орчин, уур амьсгалын өөрчлөлтийн сайд Б.Батбаатараар ахлуулсан Үндэсний хороо олон улсын хөрөнгө оруулалт татах, ногоон эдийн засгийг дэмжих чиглэлээр амжилттай ажиллаж байна.
Энэхүү хурлын үр шим нь урт хугацааны төсөл хөтөлбөрүүд болж, Монголын газар шороо, ус, ой модыг хамгаалах бодит хөрөнгө оруулалт болон үлдэх юм.
