Монголын чөлөөт бөхийн холбоо болон “Эрдэнэт” үйлдвэр хамтран олимпын жингүүдийн шилдэг найман бөхийг нэгтгэсэн чансаа өндөр тэмцээнийг Орхон аймгийн “Хангарьд” ордонд анх удаа зохион байгуулж байна. Энэхүү тэмцээн нь 90 сая төгрөгийн шагналын сантай бөгөөд олимпын бус жингийн тамирчдад ч жин өгсөж эсвэл хасаж оролцох замаар ур чадвараа сорих нээлттэй боломжийг олгосноороо онцлогтой.
МЧБХ-ноос 2026 оныг “Бэлтгэл, дасгал сургуулилалтын жил” болгон зарлаж, Японы домогт дасгалжуулагч Казүхито Сакайг урин ажиллуулж байгаа нь дотоодын тамирчдын чансааг шинэ шатанд гаргах зорилготой юм. Манай улсын шигшээ багийнхан АНУ, ОХУ, Япон зэрэг орнуудтай хамтарсан бэлтгэл хийгээд ирсэн тул энэхүү “Шилдэг-8” тэмцээн нь хийсэн бэлтгэлийнхээ үр дүнг бодитоор дүгнэх чухал талбар болж байна.
Тэмцээний эхний өдөр дараах жингүүдэд аваргууд тодорлоо:
- Эмэгтэй 50 кг: Залуучуудын болон “U23” ангиллын ДАШТ-ий хүрэл медальт М.Мөнхгэрэл түрүүлж, сүүлийн хоёр жилийн улсын аварга Б.Мөнхнарыг мөнгөн медаль дээр буулгав.
- Эмэгтэй 57 кг: ДАШТ-ий мөнгөн медальт ОУХМ Б.Хулан финалд Х.Болортуяаг ялж алтан медаль гардлаа.
- Эрэгтэй 57 кг: Сүүлийн жилүүдэд 61 кг-ын жинд хүч үзэж байсан ОУХМ З.Занабазар жин хасаж оролцон түрүү хүртсэн бол М.Даваабанди мөнгөн медаль дээр буужээ.
- Эрэгтэй 74 кг: ОУХМ З.Сумъяабазар гурав дахь удаагаа улсын аварга болсноо бататган түрүүлсэн бол МУГТ Т.Тулга жин өгсөж барилдаад хүрэл медалийн эзэн болов.
Нээлтийн ажиллагааны үеэр МЧБХ-ны ерөнхийлөгч Я.Содбаатар чөлөөт бөх бол манай улсын олимпын гол спортын нэг гэдгийг онцолж, цаашид дотоодын тэмцээний тоог тогтмол нэмэгдүүлнэ гэдгээ мэдэгдсэн юм. Ийнхүү Эрдэнэт хотод өрнөж буй барилдаанууд нь тамирчдын туршлага хуримтлуулах, өрсөлдөх чадварыг нэмэгдүүлэхэд үнэтэй хувь нэмэр оруулж байна.
