OpenAI компани ChatGPT-ийн хэрэглэгчдэд сурталчилгаа харуулах туршилтын горимыг албан ёсоор эхлүүлснээ зарлалаа. Энэхүү алхам нь хиймэл оюун ухааны илүү дэвшилтэт функцуудыг олон хүнд хүртээмжтэй болгох зорилготой бөгөөд одоогоор зөвхөн АНУ-ын нутаг дэвсгэрт туршилтын шугамаар хэрэгжиж байна.
Туршилтын хүрээнд сурталчилгааг зөвхөн Free (үнэгүй) болон Go түвшний захиалгатай хэрэглэгчдэд харуулах юм. Харин Pro, Business болон Enterprise зэрэг төлбөртэй хувилбарыг ашигладаг хэрэглэгчдийн хувьд ямар нэгэн зар сурталчилгаа харагдахгүй бөгөөд тэдний хэрэглээний орчин хэвээр үлдэх ажээ.
Компанийн мэдэгдэлд дурдсанаар, тэд сурталчилгаа ашиглан ChatGPT-ийн боломжуудыг өргөжүүлэх хүсэлтэй байгаа ч хэрэглэгчдийн итгэлийг алдахгүй байхыг чухалчилж байгаа гэнэ.
“Бид сурталчилгааг ChatGPT-ийн илүү дэвшилтэт функцуудад хүрэх замыг нээж өгөөсэй гэж хүсэж байна. Гэхдээ хэрэглэгчдийн чухал, хувийн асуултдаа ашигладаг энэхүү орчны нууцлал, итгэлийг алдагдуулахгүй байхад анхаарна. Бид туршилтыг эхлүүлж, хэрэглэгчдийн санал гомдлыг сонссоны үндсэн дээр бүх зүйлийг зөв голдирлоор хийх болно” хэмээн OpenAI онцолжээ.
