Монголын спортын сэтгүүлчдийн холбооны дөрөв дэх ерөнхийлөгч, спорт, олимпизмын салбарт олон жил зүтгэж ирсэн Чүлтэмийн Отгонбаатарт Монголын Үндэсний Олимпын Хорооны (МҮОХ) нэр хүндтэй дээд шагнал болох “Алтан од” одон гардууллаа. Тэрбээр спортын сэтгүүлзүй, олимпын үнэт зүйлсийг олон нийтэд түгээн дэлгэрүүлэх ажилд өөрийн амьдрал, хөдөлмөрөө зориулсан нэгэн юм.
Шагналыг Олон улсын олимпын хорооны гишүүн, МҮОХ-ны ерөнхийлөгч Б.Баттүшиг гардан өгч, түүний олон жилийн уйгагүй хөдөлмөр, тууштай байр суурийг өндөр үнэлснээ илэрхийлжээ. Ч.Отгонбаатар нь өвлийн болон зуны нийт 12 олимпын наадам, Азийн зуны 7 наадам, өвлийн 6 наадмыг газар дээрээс нь сурвалжилж, монгол үзэгчдэд спортын түүхэн агшнуудыг бодит, шууд дамжуулдаг байснаараа спортын сэтгүүлзүйн хөгжлийн нэг багана болсон хэмээн үнэлэгддэг.
