Монгол Улсын Ерөнхийлөгчийн санаачилсан “Тэрбум мод” үндэсний хөдөлгөөнд Булган аймаг идэвхтэй нэгдэж, сүүлийн дөрвөн жилийн хугацаанд томоохон үр дүн үзүүлээд байна. Тус аймаг 2022 оноос хойш үе шаттайгаар мод тарих ажлыг зохион байгуулж, өнөөдрийн байдлаар нийт 2.5 сая гаруй мод тарьж ургуулаад байгаа юм. Энэхүү үзүүлэлтийг аймгийн нийт хүн амд харьцуулбал нэг иргэнд дунджаар 41 мод ногдож байгаа нь улсын хэмжээнд өндөр үзүүлэлтэд тооцогдож байна.
Булган аймгийн зүгээс уг хөдөлгөөний хүрээнд нийт 20 сая мод тарих алс ирээдүйн зорилтыг тавин ажиллаж байгаа бөгөөд жил бүрийн гүйцэтгэлийг дурдвал:
- 2022 онд: 755,099 мод
- 2023 онд: 710,065 мод
- 2024 онд: 466,379 мод
- 2025 онд: 618,411 мод
Орон нутгийн удирдлагууд зөвхөн мод тарихаас гадна тэдгээрийг арчлан хамгаалах, усалгааны системийг шийдвэрлэхэд онцгой анхаарч байна. Тухайлбал, Гурванбулаг суманд Байгаль хамгаалах сангийн 30 сая төгрөгийн санхүүжилтээр орчин үеийн усалгааны системийг суурилуулсан нь модны ургалтыг дэмжих чухал алхам болжээ. Мөн Булган сумын Майдарын голын хөвөөнд төрийн 28 байгууллага нэгдэж 5585 мод тарьсан нь хамтын ажиллагааны сайн жишээ болж байна.
Булган аймаг нь 1.9 сая гаруй га ойн сантай, байгалийн баялаг нөөцтэй бүс нутаг бөгөөд ой модыг нөхөн сэргээх нь экосистемийн тэнцвэрт байдлыг хадгалахад шийдвэрлэх үүрэгтэй. Мэргэжилтнүүдийн үзэж буйгаар ийнхүү ойжуулалт хийх нь усны нөөцийг хамгаалах, агаарыг цэвэршүүлэхээс гадна биологийн олон янз байдлыг хадгалан үлдэх ач холбогдолтой юм. Хангал сумын Хялганат тосгонд байрлах сургалт, туршилтын төв болон Онцгой байдлын алба хаагчид ой хээрийн түймрээс урьдчилан сэргийлэх чиглэлээр идэвхтэй ажиллаж, шинээр тарьсан болон байгалийн ойгоо хамгаалж байна.
