АНУ-ын алдарт дуучин Бритни Спирс Калифорни мужийн Вентура тойрогт согтуугаар тээврийн хэрэгсэл жолоодож байгаад саатуулагдсан талаар “TMZ” портал хууль сахиулах байгууллагын эх сурвалжийг иш татан мэдээллээ.
Дуучин бүсгүйг найман цаг гаруй саатуулсны эцэст сулласан бөгөөд тэрээр ирэх 5 дугаар сарын 4-ний өдөр шүүхэд дуудагджээ. Энэ нь түүний хувьд замын хөдөлгөөний дүрэм зөрчсөн анхны тохиолдол биш юм. Өмнө нь буюу 2007 онд Спирс зам тээврийн осол гаргаад хэргийн газрыг орхиж явсан, мөн Калифорни мужид хүчингүйд тооцогдох жолооны үнэмлэхтэй машин жолоодсон гэх хоёр хэрэгт холбогдож байсан билээ. Тухайн үед түүнд хорих ял тулгарч байсан ч яваандаа бүх хэргийг нь хэрэгсэхгүй болгож байжээ.
