БНХАУ-ын нийслэл Бээжин хотод гурван өдрийн турш болсон Дэлхийн хүн дүрст роботын наадам 16 орны 280 багийг цуглууллаа. Энэ арга хэмжээ нь робот техникийн болон хиймэл оюуны хөгжлийн хамгийн сүүлийн ололтыг танилцуулах талбар болжээ.
Роботууд зөвхөн уламжлалт спортын төрөлд бус, тусгай даалгавруудаар ч өрсөлдсөн байна. Тухайлбал, хөнгөн атлетик, ширээний теннис зэрэг спортын төрөлтэй зэрэгцэн эмийн сортировка, материал боловсруулах, цэвэрлэгээ хийх зэрэг бодит хэрэглээнд чиглэсэн сорилтуудыг гүйцэтгэсэн.
Тэмцээнд их сургуулиуд болон хувийн компаниудын багууд оролцсон бөгөөд тэдний дунд Хятадын Unitree, Fourier Intelligence, Booster Robotics зэрэг байгууллагууд багтжээ.
Оролцогчид энэ тэмцээн нь зөвхөн өрсөлдөөн бус, мөн судалгааны үнэ цэнтэй платформ гэдгийг онцолжээ. Германы Лейпциг хотын хэрэглээний шинжлэх ухааны их сургуультай холбоотой HTWK Robots багийн гишүүн Макс Полтер:
“Бид энд тоглож, ялалт байгуулахын зэрэгцээ судалгаа хийхийг хүсдэг. Шинэ санаа турших боломжтой. Хэрэв бүтэлгүйтвэл харамсалтай, гэхдээ бүтэлгүй бүтээгдэхүүнд асар их мөнгө үрэхээс дээр” гэж ярьсан байна.
Үзэгчид олон хөгжилтэй мөчийн гэрч болжээ — зарим робот хөлбөмбөг, гүйлтийн үеэр унаж, бүр бөөгнөрсөн байдал ч үүссэн. Гэсэн ч олон хүн дүрст робот өөрсдөө боссон нь олны алга ташилтыг хүртэв.
Зохион байгуулагчид тэмцээний практик ач холбогдлыг онцолсон. Тэмцээний үеэр цугларсан өгөгдөл нь үйлдвэр, үйлдвэрлэлийн шугамд ашиглах роботуудыг сайжруулахад тусална. Тухайлбал, хөлбөмбөгийн тоглолтууд нь роботуудын багийн ажиллагаа, зохицуулалтын чадварыг хөгжүүлдэг.
Хятад улс хүн амын хөгшрөлт болон АНУ-тай технологийн өрсөлдөөнд хариу болгон хүн дүрст роботын хөгжилд идэвхтэй хөрөнгө оруулж байна. Сүүлийн саруудад тус улс роботын марафон, тусгай жижиглэнгийн дэлгүүр зэрэг олон арга хэмжээг зохион байгуулжээ.
