Олон улс орноор аялж, тухайн орны ард иргэдийн ахуй амьдралыг харуулсан бичлэгүүдээрээ үзэгчдэд танигдсан аялагч Б.Мөнхцэлмэг “YouTube” сувгаар 144 мянган дагагчтай болж, “Silver Play Button” шагналын эзэн болсон байна.
“Silver Play Button” нь 100 мянган дагагч давсан суваг бүрт олгодог бөгөөд YouTube компанийн захирал Сьюзан Вожицкигийн гарын үсэг бүхий талархлын захидалтай хамт ирдэг уламжлалтай.
Тэрбээр энэ талаар өөрийн цахим хуудсандаа “Юүтүүбийн Silver Button шагналаа хүлээн авч юүтүүбийн “тэргүүний ажилтан” боллоо. Одоогоос дөрвөн сарын өмнө анхны хаягаа устгуулчхаад инээх уйлахын хооронд байхад үзэгч олон та бүхэн минь, Монголын аж ахуйн нэгжүүд минь “Урам нь хугарвал бурмаар тэтгэ” гэдэг шиг улам хүчтэй дэмжиж аяны дөрөөнд минь ахин мордуулж өгч билээ. Бүгдээрээ энэ эрчээрээ эх дэлхийгээ тойрно. Монголчууд хамтдаа аль ч улсын амьдрал дунд нь орно” хэмээн бичжээ.
