Ерөнхий сайд асан, УИХ-ын гишүүн Л.Оюун-Эрдэнийн хүү О.Тэмүүлэнтэй холбоотой хөрөнгийн эх үүсвэрийн асуудлыг Авлигатай тэмцэх газар (АТГ) 60 хоногийн хугацаанд шалгаж, дүгнэлтээ мэдээлжээ.
АТГ-ын албан ёсны мэдэгдэл
“Монгол Улсын Ерөнхий сайд асан, Улсын Их Хурлын гишүүн Л.Оюун-Эрдэнийн хүү иргэн О.Тэмүүлэнтэй холбоотойгоор цахим орчин, хэвлэл, мэдээллийн хэрэгсэлд гарсан болон иргэд, хуулийн этгээдээс ирүүлсэн гомдол, мэдээллүүдийг нэгтгэн Авлигын эсрэг хууль болон Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийг баримтлан Авлигатай тэмцэх газраас хянан шалгалаа.
Нийтийн албан тушаалтан нь өөрийн болон гэр бүлийн гишүүдийн хөрөнгө, орлогын мэдүүлгийг хуульд заасан хугацаанд үнэн зөв мэдүүлэх, хөрөнгө, орлогын эх үүсвэрээ бодитой, үнэн зөв тайлбарлах үүргийг хуулиар хүлээдэг. Харин иргэн О.Тэмүүлэн нь өөрийн хөрөнгө, орлогыг мэдүүлэх, тайлбарлах үүрэг бүхий нийтийн албан тушаалтан биш юм. Хяналт шалгалтаар гомдол, мэдээлэлд дурдагдсан О.Тэмүүлэнгийн зарцуулсан хөрөнгийн эх үүсвэр хууль ёсны болох нь тогтоогдлоо.
“Херо энтертайнмент групп” ХХК-ийн гүйцэтгэх захирал Б.Баатар нь тус компанийн орлогоос О.Тэмүүлэнд 2025 оны 1 дүгээр сарын 12-ны өдөр 150,0 сая төгрөг, 2025 оны 3 дугаар сарын 16-ны өдөр 80,0 сая төгрөг, 2025 оны 4 дүгээр сарын 5-ны өдөр 70,0 сая төгрөг буюу нийт 300,0 сая төгрөгийг шилжүүлэн өгсөн болох нь холбогдох этгээдүүдийн тайлбар, санхүүгийн баримтуудаар нотлогдсон байна.
Нийслэлийн Татварын газраас ирүүлсэн баримтаар “Херо энтертайнмент групп” ХХК нь 2024 онд нийтдээ 265,8 сая төгрөгийн татвар төлсөн, 2024 оны жилийн эцсийн Аж ахуйн нэгжийн орлогын албан татварын тайлангаар 6,2 тэрбум төгрөгийн борлуулалтын орлого, татвар төлөхийн өмнөх ашиг 4,1 тэрбум төгрөг болохыг тус тус тайлагнасан нь баримтаар тогтоогдож байна.
“Хүлэг контент” ХХК, “Херо энтертайнмент групп” ХХК болон захирал Б.Б, иргэн А.А нарт холбогдох асуудалд тус газрын Мөрдөн шалгах хэлтсээс хэрэг бүртгэлтийн хэрэг нээн, мөрдөн шалгах ажиллагааг явуулж байна.”
Шалгалтын дэлгэрэнгүй
- Шалгалтын хугацаа: 60 хоног.
- Шалгасан асуудал: О.Тэмүүлэнгийн хөрөнгийн эх үүсвэртэй холбоотой гомдол, мэдээлэл.
- Тогтоогдсон баримт:
- О.Тэмүүлэн нь нийтийн албан тушаалтан биш тул хөрөнгө, орлогын мэдүүлэг гаргах үүрэггүй.
- “Херо энтертайнмент групп” ХХК-иас О.Тэмүүлэнд 2025 онд нийт 300 сая төгрөг шилжүүлсэн:
- 2025.01.12: 150 сая төгрөг
- 2025.03.16: 80 сая төгрөг
- 2025.04.05: 70 сая төгрөг
- Уг шилжүүлэг нь компанийн орлогоос хууль ёсоор явагдсан болохыг санхүүгийн баримт нотолсон.
- Компанийн санхүүгийн тайлан:
- “Херо энтертайнмент групп” ХХК 2024 онд 265.8 сая төгрөгийн татвар төлсөн.
- 2024 оны борлуулалтын орлого: 6.2 тэрбум төгрөг.
- Татвар төлөхийн өмнөх ашиг: 4.1 тэрбум төгрөг.
- Одоогийн байдал: “Хүлэг контент” ХХК, “Херо энтертайнмент групп” ХХК, захирал Б.Б, иргэн А.А нарт холбогдох хэрэг бүртгэлтийн шалгалт явагдаж байна.
