Архангай аймгийн Төвшрүүлэх сумын Баян-Өндөр багийн “Дээд булаг” орчимд 2025 оны 6 дугаар сарын 25-ны өдрийн 06:06 цагт 3.7 магнитудын хүчтэй газар хөдлөлт болсон тухай мэдээллийг Онцгой байдлын ерөнхий газраас 06:17 цагт цахим шуудангаар ирүүлжээ. Тус газар нь аймгийн төвөөс зүүн зүгт 52 км, сумын төвөөс зүүн хойд зүгт 15 км-т байрладаг бөгөөд координат нь 47°27’00.0″N 102°04’48.0″E юм.
Архангай аймгийн Онцгой байдлын газраар дамжуулан Төвшрүүлэх сумын Баян-Өндөр багийн дарга болон малчдаас авсан мэдээллээр, иргэд газар хөдлөлтийн чичирхийллийг мэдэрч, гэрийн уна тооно шажигнан дуугарсан гэжээ. Газар хөдлөлтөөс үүдэн ямар нэгэн хохирол гараагүй байна.
