АНУ-ын Купертино хотноо болсон WWDC 2025 (Дэлхийн хөгжүүлэгчдийн чуулган)-ийн үеэр Apple компани iOS 26 үйлдлийн системийг албан ёсоор танилцууллаа. Шинэ систем дизайн болон функцийн хувьд iPhone хэрэглэгчдэд урьд хожид байгаагүй өөрчлөлт авчирч байна.
Шинэ нэршлийн систем
Apple компанийн зүгээс нэршлийн шинэчлэл хийж, өмнөх дугаарлалтыг орхин, тодорхой он дээр суурилсан схемд шилжжээ. Тухайлбал, iOS 18-ын дараа iOS 19 биш, харин iOS 26 гарсан. Энэ загварыг бүх системд (iPadOS, macOS, watchOS, tvOS, visionOS) нэвтрүүлж байгаа юм.
Liquid Glass: хамгийн том дизайн шинэчлэлт
iOS 26 нь “Liquid Glass” нэртэй тунгалаг, уян хатан дизайнтай интерфэйсээр ялгарч байна. Цоо шинэ товчлуурууд, хөөрхөн дүрсүүд, тод 3D эффект бүхий шилжих хөдөлгөөнүүд iPhone-н өдөр тутмын хэрэглээг илүү хөгжилтэй болгоно. Хэрэглээний аппууд ч шинэлэг харагдах байдлаар шинэчлэгдсэн.
Шинэ функцууд: ChatGPT, Genmoji, Games апп
- Games: найзуудтайгаа холбогдон тоглох, амжилтаа хуваалцах боломжтой шинэ тоглоомын платформ.
- Камерын шинэ интерфэйс: зураг, бичлэг авах горимыг хялбар идэвхжүүлж болох, хурдан нэвтрэх бүтэцтэй болжээ.
- Genmoji: хэрэглэгчид өөрийн дүр төрхийг илэрхийлэх эмодзи үүсгэх боломжтой болсон.
- Image Playground + ChatGPT: зураг үүсгэгч функцэд AI туслах нэвтэрч, хэрэглэгч өөрийн загварын стилийг бүтээж чадна (жишээ нь, уригдах хуудасны дизайны санаа).
- Бодит цагийн орчуулга: утсаар ярих, мессеж бичих, эсвэл FaceTime дуудлага хийх үед шууд орчуулсан хадмал текст гарч ирэх боломжтой болсон.
iPadOS 26 шинэчлэл
iPad хэрэглэгчдэд зориулсан iPadOS 26-д цонхны шинэ систем нэвтэрч, Mac интерфейстэй илүү төстэй болсон. Цонхнуудыг хүссэн хэмжээгээр тохируулан ашиглах, олон апп зэрэг ажиллуулах хялбар болсон.
Хиймэл оюун ухаан хөгжүүлэгчдэд нээлттэй
Apple компанийн суурь хэлний загваруудыг хөгжүүлэгчдэд нээлттэй болгох шийдвэр гарч, гуравдагч талууд хэрэглэгчийн хэрэгцээнд нийцсэн AI функцуудыг өөрсдийн аппд нэвтрүүлэх боломжтой болжээ.
Ямар төхөөрөмжүүд iOS 26 авах вэ?
- iPhone 11 ба түүнээс хойших бүх загвар
- iPhone SE (2020, 2022)
- iPhone 15 Pro ба түүнээс дээших загварууд нь Apple Intelligence зэрэг шинэлэг AI функцуудыг ашиглах боломжтой.
iOS 26 системийг намар албан ёсоор гаргах бөгөөд хөгжүүлэгчдэд зориулсан эхний бета хувилбар аль хэдийн бэлэн болсон байна.
