Apple компанийн гүйцэтгэх захирал Тим Кук орлогын тайлангийн үеэр мэдэгдэхдээ, Ерөнхийлөгч Дональд Трампын тогтоосон худалдааны тарифууд энэ улиралд компанийн зардлыг 900 сая ам.доллараар нэмэгдүүлэхээр байгааг дурдлаа. Уг мэдэгдлийн дараа компанийн хувьцааны ханш арилжааны дараах хугацаанд 3.8%-иар унаж, нэгж хувьцаа 205.1 ам.доллар болсон байна.
Нийлүүлэлтийн сүлжээний томоохон өөрчлөлт
Тим Кукийн хэлснээр, АНУ-д зарагдах iPhone утаснуудын үйлдвэрлэлийг Хятадаас Энэтхэг рүү шилжүүлж байгаа аж. Цаашдаа АНУ-д борлуулагдах ихэнх iPhone Энэтхэг улсад үйлдвэрлэгдэх юм.
Мөн:
- АНУ-д зарагдах iPad, Mac, Apple Watch, AirPods бараг бүгд Вьетнамаас гаралтай байх болно.
- АНУ-аас бусад зах зээлд Хятад улсаас нийлүүлэлт үргэлжлэх юм байна.
Орлого таамгаас давсан ч үйлчилгээний салбар буурав
Apple компанийн 3-р сарын орлого хүлээлтээс өндөр гарсан бөгөөд үүнд iPhone-ийн борлуулалт гол үүрэг гүйцэтгэжээ. Гэсэн хэдий ч, өндөр ашгийн маржинтай үйлчилгээний бизнесийн орлого хүлээлтээс доогуур гарч, нийт ашгийг хэсэгчлэн бууруулсан байна.
Тарифын нөлөөлөл тодорхой бус хэвээр
Кук: “Одоогийн дэлхийн тарифын түвшин, бодлого өөрчлөгдөхгүй, шинэ тариф нэмэгдэхгүй гэж үзвэл энэ улиралд 900 сая ам.долларын нэмэлт зардал гарах төлөвтэй” гэж хэлжээ.
Тэрбээр 3-р сарын улиралд Трампын тарифын нөлөө хязгаарлагдмал байсан ч ирэх улиралд тодорхой бус байдал давамгайлж буйг анхааруулсан юм.
Трампын шинэ тарифууд Apple-д дарамт үүсгэв
Дональд Трамп 4-р сард Хятадаас импортлох бараа бүтээгдэхүүнд 145%-ийн тариф ногдуулсан ч электроникийн импортод түр хугацааны хөнгөлөлт үзүүлсэн. Гэвч Цагаан ордон удахгүй электроник бараанд тусдаа тариф тогтоохоор төлөвлөж байгаа талаар дохио өгөөд байна.
Apple компани бүтээгдэхүүнийхээ 90%-ийг Хятадад үйлдвэрлэдэг учраас өндөр тарифууд энэ технологийн аваргад ихээхэн дарамт болж байгаа юм. Энэ оны эхээр тус компани Энэтхэгээс АНУ-д хэдэн зуун мянган iPhone яаравчлан илгээсэн нь тарифын шинэ өөрчлөлтөөс зайлсхийх оролдлого байсан хэмээн хэвлэлүүд мэдээлжээ.
