2025 оны 4-р сарын 5-ны Бямба гарагт АНУ-ын бүх муж, 1200 гаруй хотод Ерөнхийлөгч Дональд Трамп болон түүний холбоотон Илон Маскын бодлогын эсрэг өргөн цар хүрээтэй эсэргүүцлийн жагсаал болов.
Эдгээр жагсаалуудыг хүний эрхийн байгууллагууд, үйлдвэрчний эвлэл, ЛГБТК+ нийгэмлэг, ахмад дайчид болон улс төрийн идэвхтнүүд зэрэг 150 гаруй бүлэг хамтран зохион байгуулжээ. “Гар хүрэх хэрэггүй!”, “Ардчиллаа хамгаалцгаая!” гэсэн уриан дор энэхүү жагсаал улс даяар энх тайвнаар явагдсан бөгөөд баривчилгаа, эмх замбараагүй байдал бүртгэгдээгүй байна.
Жагсагчид Вашингтоны Үндэсний талбайгаас эхлээд Манхэттен, Анкоридж, Бостон, Палм-Бич зэрэг бүс нутгуудад Трампын засаг захиргааны хэт барууны бодлого, төрийн байгууллагуудыг татан буулгах, нийгмийн хамгааллын төсөв хасах, цагаачлалын эсрэг үйл ажиллагаа, хүний эрхийн хязгаарлалт зэрэгт эсэргүүцлээ илэрхийлжээ.
Бостон хотод жагсагчид “Ардчиллын маань төлөөх гар битгий хүр!”, “Нийгмийн халамжийн системийг минь бүү устга!” хэмээн бичсэн самбар барьж жагссан бол Флоридагийн Палм-Бич-Гарденс хотод Трампын гольфын талбайн ойролцоо хэдэн зуун хүн жагсав.
Жагсаалтай зэрэгцэн Цагаан ордноос гаргасан мэдэгдэлд Трамп амралтын өдрүүдээр гольф тоглож, жагсаалд хариу өгөөгүй болохыг дурдсан байна.
Жагсаалын зохион байгуулагч “Indivisible” байгууллагын үүсгэн байгуулагч Эзра Левин “Энэ бол Илон Маск, Трамп, Бүгд найрамдахчууд, MAGA хөдөлгөөний холбоотнуудад хүргэж буй хүчтэй дохио. Бидний ардчилалд гар бүү хүр!” хэмээн мэдэгджээ.
Жагсаал зөвхөн АНУ-аар хязгаарлагдаагүй бөгөөд Канад, Их Британи, Франц, Герман, Мексик, Португал зэрэг орнуудад ч зохион байгуулагджээ. Вашингтонд болсон үндсэн жагсаалд хэдэн мянган хүн оролцсон байна.
Эсэргүүцлийн ажиллагааг “MoveOn”, “Working Families Party”, “Greenpeace”, “Human Rights Campaign” болон 2 сая гаруй гишүүнтэй үйлчилгээний ажилчдын олон улсын үйлдвэрчний эвлэл дэмжжээ.
Сонирхуулахад, гуравдугаар сарын 29-нд дэлхийн өнцөг булан бүрт олон мянган хүн Илон Маск болон Трампын АНУ-ын холбооны засгийн газрыг дотроос нь задлахыг санаархсан үйлдлийн эсрэг эсэргүүцлээ илэрхийлж байсан юм.
