Google компани Android 16 системийн шинэ хувилбарыг дэмжигдсэн Pixel төхөөрөмжүүдэд танилцууллаа. Шинэчлэл нь аюулгүй байдал, хүртээмж, мэдэгдлийн системийг сайжруулсан хэдий ч хэрэглэгчдийн хамгийн их хүлээж байсан Material 3 Expressive интерфейс болон Desktop Mode одоогоор алга байна.
Material 3 Expressive: Загварын шинэ эрин
Google-ийн шинэ загварын философи болох Material 3 Expressive нь дараах шинэ боломжуудыг багтаана:
- Түргэн тохиргооны цэсийг бүрэн шинэчилсэн
- Реалист физик хөдөлгөөнтэй анимаци
- Илүү ухаалаг өнгөний схемүүд
- Арын бүдэгрүүлэлтийн эффект
- Дэлгэрэнгүй хувийн тохиргоо
- Шинэ товчлуур ба дүрснүүд
Эдгээр шинэчлэлүүд нь 2025 оны 9-р сарын 3-нд гарах Android 16 QPR1 хувилбарт албан ёсоор багтах юм. Харин эх кодыг 8-р сарын 20-нд олон нийтэд нээлттэй болгоно. Одоогоор Pixel хэрэглэгчид Android 16 QPR1-ийн бета хувилбарыг турших боломжтой.
Desktop Mode: Android-ийг компьютер шиг ашиглах боломж
Шинээр нэмэгдсэн Desktop Mode нь төхөөрөмжийг гадаад дэлгэцтэй холбох үед компьютерын орчныг бүрдүүлнэ. Үүнд:
- Taskbar болон статус цэс
- Олон цонхны дэмжлэг
- Хулгана ашиглан дэлгэц хооронд шилжих
- Аппликейшнүүдийг зэрэг ажиллуулах, сесс хадгалах боломж
Уг функц нь одоогоор зөвхөн Android 16 QPR1 Beta 2 дээр нууц тохиргоогоор идэвхжих бөгөөд Settings > System > Developer options > enable desktop experience features замаар тохируулах боломжтой.
Ямар төхөөрөмжүүд дэмжих вэ?
Desktop Mode ашиглахад DisplayPort шаардлагатай тул энэ горимыг зөвхөн Pixel 8 болон дараах загварууд (A-серийн орсон) дэмжинэ. Харин Pixel Tablet өөрийн дэлгэц дээрээ тус горимыг ажиллуулах боломжтой.
