Улсын Их Хурал дахь Ардчилсан намын бүлэг өнөөдөр хаалттай хуралдаан зарлаж, парламентын үйл ажиллагаатай холбоотой зарчмын хатуу байр суурь баримтлахаар тогтлоо. Тус бүлгийн зүгээс УИХ-ын дарга Н.Учралыг албан тушаалаа хүлээлгэн өгөх хүртэл чуулганы нэгдсэн хуралдаанд оролцохгүй гэдгээ албан ёсоор зарлаад байна.
Бүлгийн дарга О.Цогтгэрэл энэхүү шийдвэрийг гаргах болсон гол үндэслэлүүдээ дараах байдлаар тайлбарлалаа:
- 126 гишүүнтэй, олон намын төлөөллөөс бүрдсэн парламентыг эрх баригч намын дарга удирдаж буй нь ардчиллын зарчимд нийцэхгүй.
- 2016 оноос хойш үргэлжилсэн нэг намын хэт үнэмлэхүй засаглал нь авлигыг тогтолцооны түвшинд хүргэж, улс төрийн хямрал үүсгэсэн.
- УИХ-ын үйл ажиллагаа бодит мэтгэлцээн өрнөх талбар байх ёстой боловч одоогийн зохицуулалт нь системийн алдаатай байна.
О.Цогтгэрэл дарга хэлэхдээ “Аль нэг намын дарга нь 126 гишүүнтэй олон намын парламентын үйл ажиллагааг удирдаж болохгүй. Өнөөгийн УИХ-ын дарга, МАН-ын даргаар хавсран ажиллаж байгаа Н.Учралыг УИХ-ын даргаа өгөх хүртэл АН-ын бүлэг чуулганы хуралдаанд оролцохгүй. Гэхдээ энэ нь УИХ-ын үйл ажиллагааг тасалдуулах аливаа үйлдэл биш” хэмээн онцолсон юм. Тэрбээр энэ нь зөвхөн одоогийн даргад хамааралтай биш, өмнө нь Д.Амарбаясгалангийн үед ч баримталж байсан ижил зарчим болохыг тодотгоод, бүлгийн 41 гишүүн 100 хувийн саналаар энэхүү шийдвэрийг дэмжсэн гэв.
Мөн УИХ-ын дарга Х.Тэмүүжин “УИХ-ын дарга асан Д.Амарбаясгалан намын даргад өрсөлдөнө гэдгээ мэдэгдсэний дараа бид энэ зарчмыг мөн ярьсан. Намын дарга парламентыг удирдах нь тохиромжгүй гэдгийг Д.Амарбаясгалан даргад хүргүүлсний дараа намын даргын сонгууль дуусах хүртэл дэд дарга нар чуулганыг хуралдуулсныг та бүхэн санаж байгаа. МАН бол даргаа шүтдэг, даргын үг хууль байдаг нам. Энэ нь парламентын засаглалтай нийцэхгүй” хэмээн байр сууриа илэрхийллээ. Энэхүү эсэргүүцэл нь парламентад эрүүл саруул мэтгэлцээнийг эргүүлэн авчрах, засаглалын тэнцвэрийг хадгалахад чиглэж буйг цөөнхийн бүлгийнхэн сануулж байна.
