Америкийн жүжигчин, кинорежиссёр, продюсер Роберт Редфорд 9-р сарын 16-ны мягмар гарагийн өглөө АНУ-ын Юта муж дахь гэртээ 89 насандаа таалал төгслөө. Түүний үхлийн тухай мэдээллийг түүний хамтран ажиллаж байсан сурталчилгааны агентлагийн гүйцэтгэх захирал Синди Бергер хэвлэлд мэдэгджээ гэж The New York Times мэдээлэв.
Бергерийн хэлснээр, жүжигчин нойрон дунд нас барсан бөгөөд тодорхой шалтгааныг дурдаагүй. Тэрээр “хайртай газраа, ойр дотнын хүмүүсийнхээ дунд” хорвоог орхисон гэжээ.
Кино карьерыг нь тодотгосон бүтээлүүд
Роберт Редфорд өөрийн уран бүтээлийн карьертаа 100 гаруй Голливудын кинонд тогложээ. Түүний хамгийн алдартай бүтээлүүдийн дунд:
- Butch Cassidy and the Sundance Kid (1969)
- Three Days of the Condor (1975)
- All the President’s Men (1976)
Жүжигчинээр тоглосон хамгийн өндөр орлоготой кино нь 1993 онд гарсан Indecent Proposal байв. Энэ бүтээлд Деми Мур, Вуди Харрельсон нар гол дүрд тоглосон бөгөөд нийт 267 сая ам.долларын орлого олжээ.
“Оскар” болон уналт, өсөлт
Редфорд жүжигчний хувиар The Sting (1973) киноны дүрээр “Оскар”-т нэр дэвшсэн. Харин найруулагчаар анхныхаа бүтээл Ordinary People (1981) киногоороо “Оскар”-ын шагнал хүртсэн.
Тэрээр мөн 1981 онд Sundance хараат бус киноны хүрээлэн байгуулж, олон улсын нэр хүндтэй Sundance кино наадмыг санаачилсан. Гэвч цаг хугацааны таагүй байдлаас шалтгаалан зарим бизнесийн төслүүд нь алдагдалд орж, 2000 онд төлөвлөж байсан Sundance кинотеатрын сүлжээ дампуурсан тухай NYT онцолжээ.
