Шар металлын ханш энэ онд тогтмол өсөлт үзүүлсээр, дахин түүхэн дээд түвшиндээ хүрлээ. Аравдугаар сард ажиглагдсан бага зэргийн саатал арилж, алтны унц тутмын үнэ 3.37 хувиар өсөн 4,486.55 ам.долларт хүрснээр 4,400-ийн босгыг анх удаа давж байна. Үүний зэрэгцээ мөнгөний үнэ ч мөн адил өсөж, унц нь 69.48 ам.долларт хүрсэн нь хөрөнгө оруулагчдын анхаарлыг татаж байна.
Үнийн өсөлтөд нөлөөлсөн гол хүчин зүйлс
Оны эхэнд алтны ханш 2,600 ам.доллар орчимд хэлбэлзэж байсан бол өдгөө 69 хувиар нэмэгдсэн нь 1979 оноос хойших хамгийн хүчтэй үсрэлт болж тэмдэглэгдлээ. Энэхүү огцом өсөлтөд дараах хүчин зүйлс голлон нөлөөлж байна гэж шинжээчид үзэж байна:
- Геополитикийн хурцадмал байдал: АНУ-ын засаг захиргааны гаалийн татварын бодлого болон Венесуэлтэй үүссэн дипломат зөрчил нь зах зээлд тодорхойгүй байдал үүсгэв.
- Мөнгөний бодлогын хүлээлт: АНУ-ын Холбооны нөөцийн сан бодлогын хүүгээ бууруулах магадлалтай байгаа нь санхүүгийн салбарт томоохон хүлээлт үүсгэлээ.
- Эрсдэлээс хамгаалах стратеги: Хөрөнгө оруулагчид эдийн засгийн тогтворгүй үед хамгийн найдвартай капитал гэгддэг алтыг илүүд үзэж, хөрөнгөө тийш нь шилжүүлж байна.
Шинжээчдийн дүгнэлт
“Nemo.Money” фирмийн шинжээчдийн үзэж байгаагаар олон улсын харилцааны хурцадмал байдал нь үнийг ийнхүү хөөрөгдөх гол хөшүүрэг болж байна. Тэрээр хэлэхдээ: “Алтны үнэ сүүлийн үед рекорд тогтоох хэмжээнээс бага зэрэг доогуур хэлбэлзэж байсан бол одоо өсөж түүхэн дээд хэмжээндээ хүрлээ”.
Ийнхүү алт нь дэлхийн эдийн засгийн эрсдэлийн эсрэг гол бамбай хэвээр байгааг энэ жилийн үзүүлэлтүүд баталж байна. Хөрөнгө оруулагчдын хувьд алт болон мөнгөний үнийн цаашдын чиг хандлага геополитикийн шийдвэрүүдээс шууд хамааралтай байх төлөвтэй байна.
Алт ингэж их өснө гэж бодоогүй шүү, сонин л мэдээ байна