Өнөөдөр буюу 2026 оны нэгдүгээр сарын 26-ны өглөө дэлхийн зах зээл дээр алтны ханш унци тутамдаа 5000 ам.долларын босгыг давж, үнэмлэхүй дээд амжилт тогтоолоо. Энэ нь 2025 онтой харьцуулахад шар металлын үнэ 60 хувиар өссөн үзүүлэлт бөгөөд хөрөнгө оруулагчдын дунд жинхэнэ “алтны халуурал” үүсгээд байна.
Шар металлын үнэ ийнхүү огцом өсөхөд дэлхийн хэмжээнд өрнөж буй улс төрийн тогтворгүй байдал болон томоохон гүрнүүдийн дипломат зөрчил голлон нөлөөлж байна.
- Улс төрийн цочрол: Гренландын асуудал тойрсон маргаан болон Венесуэлийн Ерөнхийлөгч Н.Мадурог олзолсон үйл явдал нь олон улсын харилцаанд тодорхойгүй байдал авчирлаа.
- АНУ-ын татварын бодлого: Ерөнхийлөгч Дональд Трамп Хятадтай худалдааны гэрээ байгуулсан тохиолдолд Канад улсын эсрэг 100 хувийн татвар оноохоор сүрдүүлсэн нь зах зээлийн тогтвортой байдлыг алдагдуулж байна.
- НАТО-гийн зөрчил: АНУ болон НАТО-гийн хооронд үүссэн дипломат үл ойлголцол нь хөрөнгө оруулагчдыг “эрсдэлгүй актив” болох алт руу хошууруулах гол хөшүүрэг болов.
Үнэт металлын зах зээлийн бусад өөрчлөлт
Зөвхөн алт гэлтгүй бусад үнэт металлын үнэ ч дэлхийн зах зээлд огцом нэмэгдэж байна. Өнгөрсөн Баасан гарагт мөнгөний ханш унци тутамдаа 100 ам.доллар давсан нь өнгөрсөн жилийнхээс 150 хувиар өссөн үзүүлэлт юм.
“Эдийн засаг болон улс төрийн нөхцөл байдал ийнхүү ээдрээтэй болсон үед хөрөнгө оруулагчид өөрсдийн хөрөнгөө хамгаалахын тулд хамгийн найдвартай баталгаа болох алт, мөнгийг сонгодог нь бичигдээгүй хууль юм.”
Нөөц ба олборлолтын боломж
АНУ-ын Геологийн албаны (USGS) хамгийн сүүлийн үеийн судалгаагаар дэлхийн газар доорх нөөцөөс дахин 64 мянган тонн алт олборлох боломжтой гэж үзэж байна. Үнийн ийм өндөр өсөлт нь уул уурхайн компаниудын хувьд шинэ орд хайх, олборлолтоо нэмэгдүүлэх томоохон сэдэл болж байгаа хэдий ч байгаль орчны асуудал болон олборлолтын зардал нэмэгдсэн нь томоохон сорилт хэвээр байна.
