“Монгол бахархлын өдөр” тохиохтой зэрэгцэн энэ жилийн төрийн дээд шагналын эзэн тодорлоо. Монгол Улсын Ерөнхийлөгчийн зарлигаар улсынхаа эрх зүй, төр нийгмийн хөгжлийн чиглэлд олон арван жил идэвхтэй зүтгэж ирсэн Академич С.Нарангэрэл төрийн дээд шагнал, тэргүүн зэргийн “Чингис хаан” одон хүртэхээр болсон байна. Энэ нь түүний эрдэм шинжилгээний ажил, хууль зүйн шинэтгэлд оруулсан хувь нэмэр, олон нийтэд эрх зүйн мэдлэг түгээн дэлгэрүүлсэн үйлсийн өндөр үнэлгээ юм.
С.Нарангэрэл багш, судлаачийнх нь замнал бүр сургуулийн ширээнээс эхэлдэг. Улаанбаатар хотын 6 дугаар дунд сургуульд 1961–1971 онд суралцаж, улмаар 1971–1975 онд МУИС-ийн Хуулийн салбарт оюутан болж эрх зүйн суурь мэдлэгээ олжээ. Цаашлаад 1985–1988 онд Москва хотын Бүх Холбоотын дээд сургуульд аспирантурт суралцаж, онолын мэдлэг, судалгааны түвшнээ улам гүнзгийрүүлсэн нь түүний эрдэм шинжилгээний ажилд чухал түлхэц болсон юм.
Эрдмийн зэрэг, мэдлэг чадвараа зөвхөн онолын хүрээнд үлдээхгүйгээр практик талбарт ажил хэрэг болгосон нь түүнийг онцгойруулдаг. Хууль зүйн их, дээд сургуулиудад багшилж, прокурорын байгууллага, УИХ, төрийн болон төрийн бус байгууллагад ажилласан туршлага нь С.Нарангэрэлийг Монголын хууль, эрх зүйн салбарын нөлөө бүхий, нэр хүндтэй төлөөлөгчдийн нэг болгожээ.
Академич С.Нарангэрэлийн боловсрол, ажил мэргэжлийн замнал
Суралцсан сургууль, мэргэжлийн бэлтгэл
- 1961–1971 он – Улаанбаатар хотын 6-р дунд сургууль
- 1971–1975 он – МУИС, Хуулийн салбар (эрх зүйч)
- 1985–1988 он – ЗХУ, Москва хот, Бүх Холбоотын дээд сургуулийн аспирантур
Ажлын туршлага, албан тушаал
- 1975–1985 он – МУИС-ийн Хууль зүйн сургууль, багш
- 1985–1988 он – Улаанбаатар хотын Ерөнхий прокурорын орлогч
- 1988–1990 он – Улсын Ерөнхий прокурорын туслах
- 1990–1991 он – Засгийн газрын дэргэдэх судалгааны төв, эрдэм шинжилгээний ахлах ажилтан
- 1991–1992 он – Улсын Бага хурлын дэргэдэх төр, нийгэм судлалын Академийн дэд захирал
- 1992–1996 он – Улсын Их Хурлын гишүүн
- 1996–1997 он – МУИС-ийн Хууль зүйн сургууль, профессор
- 1997–2000 он – Монголын Өмгөөлөгчдийн Холбооны Ерөнхийлөгч
- 1999–2010 он – МУИС-ийн Хууль зүйн сургуулийн захирал
- 2010 оноос – МУИС-ийн Хууль зүйн сургууль, профессор
- 2012 оноос – МУИС-ийн Хууль зүйн сургуулийн Эрдмийн зөвлөлийн дарга
Ийнхүү сургалт, судалгаа, хууль тогтоох үйл ажиллагаа, өмгөөллийн байгууллага гээд эрх зүйн салбарын бүхий л түвшинд ажилласан өргөн туршлагыг нь улс орны хэмжээний үнэлгээ гэж үзэн “Чингис хаан” одонгоор шагнахаар болсон нь зүй ёсны хэрэг хэмээн ажиглагчид дүгнэж байна.
