Үндэсний их баяр наадмын өдрүүдэд буюу 2026 оны 7 дугаар сарын 10-ноос 14-ний хооронд Цагдаагийн байгууллагын 102 тусгай дугаарт нийт 9,446 дуудлага, мэдээлэл бүртгэгдсэн байна. Баярын өдрүүдэд бүртгэгдсэн дуудлага, мэдээллийн дэлгэрэнгүй тоон үзүүлэлтийг хүргэж байна.
Дуудлага, мэдээллийн бүтэц:
Нийт бүртгэгдсэн дуудлагын дунд зөрчлийн болон гэр бүлийн хүчирхийллийн шинжтэй дуудлага давамгайлж байна. Үүнд:
- Зөрчлийн шинжтэй: 3,227 дуудлага
- Гэмт хэргийн шинжтэй: 488 дуудлага
- Хүүхэд, гэр бүлийн хүчирхийллийн: 351 дуудлага
- Хулгайлах гэмт хэргийн: 79 дуудлага
- Залилах гэмт хэргийн: 67 дуудлага
Согтууруулах ундаатай холбоотой зөрчлүүд
Баяр наадмын өдрүүдэд архи, согтууруулах ундаа хэрэглэсэн үеийн зөрчил болон холбогдох дуудлага цөөнгүй гарчээ.
- Согтуугаар жолоо барьсан: Согтууруулах ундаа хэрэглэсэн үедээ тээврийн хэрэгсэл жолоодсон 317 тохиолдлыг илрүүлж, болзошгүй аюулаас урьдчилан сэргийлсэн байна.
- Эрүүлжүүлэгдсэн иргэд: Баярын өдрүүдэд нийт 414 хүнийг эрүүлжүүлжээ.
Гэмт хэргийн илрүүлэлт
Баярын өдрүүдэд цагдаагийн алба хаагчид шуурхай ажиллагаа явуулж, гэмт хэргийн шинжтэй 8 үйлдлийг халуун мөрөөр нь илрүүлсэн байна. Түүнчлэн урьд өмнө нь бүртгэгдээд байсан 13 хэргийг нөхөн илрүүлж ажиллажээ.
