2026 оны хөлбөмбөгийн Дэлхийн аварга шалгаруулах тэмцээнд (ДАШТ) хүч үзэх шилдэг 48 багийн нэрс эцсийн байдлаар тодорлоо. Тивийн хоорондын плей-оффын шатны шийдвэрлэх тоглолтод Боливийн шигшээ багийг буулган авсан Ирак улс ДАШТ-ий эрхээ авсан хамгийн сүүлийн баг болов.
Тэмцээний хэсгийн оноолтыг бүрэн эхээр нь танилцуулбал:
- Групп A: Мексик, Өмнөд Африк, Өмнөд Солонгос, Чех.
- Групп B: Канад, Швейцар, Катар, Босни ба Херцеговина.
- Групп C: Бразил, Марокко, Гаити, Шотланд.
- Групп D: АНУ, Парагвай, Австрали, Турк.
- Групп E: Герман, Кюрасао, Кот-д’Ивуар, Эквадор.
- Групп F: Нидерланд, Япон, Тунис, Швед.
- Групп G: Бельги, Египет, Иран, Шинэ Зеланд.
- Групп H: Испани, Кабо-Верде, Саудын Араб, Уругвай.
- Групп I: Франц, Сенегал, Норвеги, Ирак.
- Групп J: Аргентин, Алжир, Австри, Иордан.
- Групп K: Португал, Колумби, Узбекистан, БНАС Конго.
- Групп L: Англи, Хорват, Гана, Панама.
Харамсалтай нь, Италийн шигшээ баг гурав дахь удаагаа дараалан ДАШТ-ийг өнжихөөр болж байна. Тэд 3 дугаар сарын 31-нд болсон Европын бүсийн сонгон шалгаруулалтын плей-оффын шийдвэрлэх тоглолтод Босни ба Херцеговины багт торгуулийн цохилтоор ялагдсан юм. Харин ОХУ-ын шигшээ баг 2022 онд Олон улсын хөлбөмбөгийн холбоо (ФИФА) болон Европын хөлбөмбөгийн холбооноос (УЕФА) тавьсан хоригийн улмаас энэ удаагийн тэмцээнд оролцохгүй.
Хөлбөмбөгийн ДАШТ АНУ, Канад болон Мексик улсуудад 6 дугаар сарын 11-нээс 7 дугаар сарын 19-ний хооронд зохион байгуулагдана. Ойрхи Дорнод дахь мөргөлдөөн болон АНУ-ын оролцооноос үүдэн Ираны шигшээ баг тэмцээнээс татгалзаж магадгүй гэх мэдээлэл гараад байсан ч тэд өөрийн тоглолтуудаа АНУ-аас Мексик рүү шилжүүлэх асуудлаар ФИФА-тай хэлэлцэж байгаа ажээ.
