Монгол Улсын 35 дахь Ерөнхий сайдаар томилогдоод буй Н.Учралын Авлигатай тэмцэх газарт гаргаж өгсөн 2024 оны хөрөнгө орлогын мэдүүлгийг тоймлон хүргэж байна. Түүний хөрөнгө орлогын хамгийн анхаарал татаж буй үзүүлэлт нь гэр бүлийн жилийн орлого болон ямар нэгэн банкны зээлийн үлдэгдэлгүй байдал юм.
АТГ-ын нээлттэй мэдээллийн санд дурдсанаар шинэ Ерөнхий сайдын санхүүгийн үзүүлэлтүүдийг дараах байдлаар ангилж болно:
Орлого ба бэлэн мөнгө
- Өөрийн жилийн орлого: 1.7 тэрбум төгрөг;
- Гэр бүлийн жилийн орлого: 47 тэрбум төгрөг;
- Хадгаламж: Дотоодын банк, санхүүгийн байгууллагад 1.7 тэрбум төгрөг;
- Бэлэн мөнгө: 2022 оноос хойш өөрчлөлтгүй байгаа 7 сая төгрөг (үндсэн цалингийн үлдэгдэл);
- Бусад: 506 сая төгрөгийн бэлэг болон өв залгамжлалтай, 3 төрлийн эрх, патент эзэмшдэг.
Үл хөдлөх болон хөдлөх хөрөнгө
Тэрбээр нийт 5 тэрбум төгрөгийн үнэлгээ бүхий үл хөдлөх хөрөнгөтэй бөгөөд үүнд нийтийн орон сууц хоёр, зуслангийн байшин хоёр, үйлчилгээний зориулалттай барилга нэг, авто зогсоол хоёр багтжээ. Түүнчлэн 965 сая төгрөгийн үнэ бүхий долоон автомашинтай бөгөөд үүнд:
- Mercedes Benz, G 500, Lexus 570, Nissan Tiida, Toyota Alphard болон микро автобус зэрэг тээврийн хэрэгслүүд багтсан байна.
Бусад хөрөнгө оруулалт
- Мал аж ахуй: 60 сая төгрөгөөр үнэлэгдэх 300 орчим толгой малтай;
- Үнэт эдлэл: 85 сая төгрөгийн үнэт эдлэл, түүх, соёлын үнэт зүйлтэй;
- Компанийн хувьцаа: “Их Засаг” олон улсын их сургууль, “Массив трейд”, “Грийн ланд групп”, “Рояал академи”, “Гоц жаалууд” цэцэрлэг болон “Эрдэнэс Тавантолгой” ХК-иудад 20-100 хувийн хувьцаа эзэмшдэг.
Шинэ Ерөнхий сайдын хувьд хувийн хэвшлийн томоохон төлөөлөл болохын зэрэгцээ төрийн өндөр албан тушаалыг хашихдаа ийнхүү хөрөнгө орлогоо нээлттэй мэдүүлсэн байна. Түүний гэр бүлийн орлого ийнхүү өндөр байгаа нь эзэмшдэг боловсрол, бизнесийн байгууллагуудын үйл ажиллагаатай шууд холбоотой бололтой.
