Монголын цахим спортын тэргүүлэгч “The MongolZ” баг саяхан “BLAST Open Rotterdam 2026” тэмцээнд өрсөлдөж, 5-6 дугаар байрт шалгарсан. Харин энэ удаагийн тэмцээнд багийн дасгалжуулагч Эрдэнэдалай “maaRaa” Баянбат хамт явсангүй. Учир нь тэрбээр хоёр дахь удаагаа аав болсон баярт үйл явдал тохиосон юм.
Гэсэн ч баг нь чухал тэмцээнд дасгалжуулагчийн оролцоог орлуулшгүй гэж үзэн, “maaRaa”-гийн гэрэл зургийг арын сандал дээрээ байрлуулжээ. Энэ нь тэмцээний үеэр сонирхолтой, хөгжилтэй агшин болж, гадаадын сэтгүүлчдийн ч анхаарлыг татсан байна.
Тухайлбал, зарим сэтгүүлчид уг зургийн өмнө очиж, дасгалжуулагчаас ярилцлага авах мэт оролдлого хийсэн ч мэдээж “maaRaa” ямар ч хариу өгсөнгүй. Ийнхүү нэгэн энгийн санаачилга тэмцээний үеийн онцлох мөчүүдийн нэг болж үлджээ.
Харин тэмцээний дараа Содбаяр “Techno4K” Мөнхболд багийн дасгалжуулагчийн оролцоо ямар чухал байдгийг онцлон ярьсан байна. Тэрбээр “Aurora Gaming багтай хийсэн тулаан дасгалжуулагч ямар хэрэгтэйг харуулсан тоглолт байлаа. Inferno-д бид ялагдаж байхад дасгалжуулагч завсарлага аваад бүгд сайн хэлэлцэж болох байсан” хэмээн хэлжээ.
