413 мянга гаруй KitKat шоколадан батон тээвэрлэж явсан ачааны машиныг үл мэдэгдэх этгээдүүд дээрэмджээ. Энэ талаар Nestle компанийн хэвлэлийн албанаас эш татан Agence France-Presse (AFP) мэдээлсэн байна.
Хэрэг өнгөрсөн долоо хоногт гарсан байна. Ачааны машин Италийн үйлдвэрээс Польш дахь түгээлтийн төв рүү батон зөөж явсан бөгөөд тээвэрлэлтийн үеэр хулгайлагджээ. Компанийн мэдээлснээр “тээврийн хэрэгсэл болон доторх ачааг одоогоор олж тогтоогоогүй” байна.
“Бид хүмүүсийг KitKat-тай түр завсарлага авахыг (англ. to have a break) үргэлж уриалж ирсэн. Гэхдээ хулгайчид энэ санааг хэтэрхий шууд утгаар нь ойлгож, манай 12 тонноос давсан шоколадыг ‘тасалж’ аваад явчихлаа” хэмээн Nestle-ийн төлөөлөгч хэлжээ.
Компанийн зүгээс энэ хулгай KitKat-ийн дэлгүүр дэх нийлүүлэлтэд доголдол үүсгэж болзошгүйг анхааруулсан байна. Мөн алга болсон шоколад Европын зах зээл дэх албан бус борлуулалтын сувгуудаар худалдаалагдаж магадгүй гэжээ. Иймээс худалдан авагчдад бүтээгдэхүүний кодыг уншуулж шалгахыг зөвлөсөн байна.
“Хэрэв тохирол илэрвэл сканнер KitKat-д хэрхэн мэдэгдэх талаар тодорхой заавар өгөх бөгөөд дараа нь холбогдох нотлох баримтыг зохих журмын дагуу шилжүүлнэ” гэж мэдэгдэлд дурджээ.
