Америкийн алдарт жүжигчин Лиза Кудроу зар сурталчилгааны агент Мишель Стернтэй ханилан суугаад 30 жил болсон гэрлэлтийнхээ нууцыг хуваалцжээ. Өдгөө 62 настай, “Найзууд” (Friends) цувралын одын ярилцлагаас People хэвлэл иш татсан байна.
Кудроугийн үзэж буйгаар, урт удаан хугацаанд аз жаргалтай амьдрахын тулд хамгийн чухал нь хамт байх гэсэн чин хүсэл гэнэ.
“Бие биеэ хүндэтгэх нь хамгийн чухал. Мөн хамт үлдэхийг хүсэх, үүний дараа харилцан хүндэтгэлд дахин суралцах, түүнийгээ өдөр бүр хэрэгжүүлэх, мөн бие биеэ сонсож сурах нь гэрлэлтийн гол үндэс юм” гэж тэрээр тайлбарлажээ.
Түүх сөхвөл
Лиза Кудроу болон Мишель Стерн нар анх 1980-аад онд танилцаж байжээ. Сонирхолтой нь, тухайн үед Мишель түүний өрөөний хамтрагчтай болзож байсан гэдэг. Гэсэн хэдий ч хувь тавилан тэднийг учруулж, хосууд 1995 оны 5 дугаар сарын 27-нд гэрлэсэн юм. Тэдний хуримын ёслол маш нууцлаг, хаалттай хүрээнд болж өнгөрсөн байдаг.
Гэрлэснээс гурван жилийн дараа тэдний хүү Жулиан Мюррей мэндэлжээ. Лизаг жирэмсэн байх үед “Найзууд” цувралын зураг авалт үргэлжилж байсан тул түүний биеийн байдлыг кино зохиолд ухаалгаар тусгасан юм. Тодруулбал, түүний дүр Фиби Буффе өөрийн дүү Фрэнк болон түүний эхнэр Элис нарт тээгч эх болж, гурван ихэр хүүхэд төрүүлж өгдөг хэсэг гардаг нь бодит амьдрал дээрх Лизагийн жирэмслэлт байсан билээ.
