Олон улсын олимпын хороо (ОУОХ) түүхэн шийдвэр гаргаж, 2028 оны Лос-Анжелес хотноо болох 34 дэх удаагийн зуны олимп болон цаашдын бүх наадмуудад трансжендер эмэгтэйчүүдийг эмэгтэй ангилалд оролцуулахгүй байхаар тогтов. Мөн хүйсийн хөгжлийн ялгаатай (DSD) тамирчдыг уг ангилалд өрсөлдөхийг ийнхүү албан ёсоор хориглож байна. Уг шийдвэр нь спортын шударга өрсөлдөөн болон эмэгтэй тамирчдын аюулгүй байдлыг шинжлэх ухааны үндэслэлтэйгээр хамгаалах зорилготой юм.
Шинэ журмын хүрээнд эмэгтэйчүүдийн төрөлд хүч үзэх хүсэлтэй бүх тамирчин SRY буюу Y хромосомын хүйс тодорхойлогч бүсийн генийн шинжилгээнд нэг удаа заавал хамрагдах шаардлагатай боллоо. Энэхүү сорилыг шүлс эсвэл хацрын арчдас ашиглан биед зовуурьгүй аргаар авах бөгөөд биологийн хүйсийг албан ёсоор баталгаажуулах гол үндэслэл болох ажээ.
ОУОХ-ны ерөнхийлөгч Кирсти Ковентри энэхүү шийдвэрийн шалтгаанаа тайлбарлахдаа “Биологийн хувьд эрэгтэй хүмүүс эмэгтэй ангилалд өрсөлдөх нь шударга бус. Олимпын наадамд маш өчүүхэн ялгаа хүртэл ялалт, ялагдлыг шийддэг тул энэ нь тодорхой зүйл. Мөн зарим спортод энэ нь аюулгүй байдлын хувьд эрсдэлтэй байж болно” хэмээн онцолсон байна. Тэрбээр өөрөө тамирчин байсан хүний хувьд бүх оролцогчдыг тэгш, шударга нөхцөлд өрсөлдөх эрхтэй гэж үздэгээ илэрхийлжээ.
Сүүлийн арван жилийн турш спортын ертөнцөд трансжендер тамирчдын асуудал идэвхтэй хэлэлцэгдэж, дараах тохиолдлууд анхаарал татаж байв:
- Лорел Хаббард: 2021 оны олимпод оролцсон Шинэ Зеландын хүндийн өргөлтийн тамирчин, хүйсээ сольсон анхны трансжендер эмэгтэй.
- Кастер Семеня: Өмнөд Африкийн тамирчин, 2012 болон 2016 оны олимпын 800 метрийн зайн аварга (DSD тамирчин).
- Имане Хелиф: 2024 оны Парисын олимпод оролцож шуугиан тарьсан Алжирын боксчин (DSD тамирчин).
Ковентригийн мэдэгдсэнээр энэхүү бодлого нь анагаахын нарийн мэргэжилтнүүдийн удирдлага дор боловсруулагдсан бөгөөд ганцаарчилсан болон багийн бүх дээд түвшний спортод ижил тэгш үйлчлэх юм. ОУОХ ийнхүү шинжлэх ухаанд тулгуурласан шийдвэр гаргаснаар эмэгтэйчүүдийн спортын шударга байдлыг хадгалах түүхэн алхам хийлээ.
