Японы Фукушима мужаас “лусын дагинын муми” хэмээн нэрлэгдээд буй нэгэн ер бусын олдвор олджээ. Нэгэн хуучин байшингаас олдсон уг амьтны үлдэгдэл нь хурц шүдтэй, том мөчүүдтэй бөгөөд загасных шиг сүүлтэй аж.
Энэ талаар “The Sun” хэвлэл мэдээллээ. Олдворын гадаад төрх нь Японы домгийн амьтан болох Каппатай (Kappa – усны ай сав газарт амьдардаг, хүмүүсийг ус руу татаж оруулдаг гэгддэг домгийн амьтан) тун төстэй байгаа юм. Японы уламжлалт соёлд ийм төрлийн амьтдыг гол мөрөн, нуурын аюултай савдаг гэж үздэг байна.
Энэхүү хачирхалтай үзмэрийг 3 дугаар сарын сүүлээр Йонезава хотод болох “Ошү” (Oshu) ховор эд зүйлсийн дуудлага худалдаагаар зарахаар төлөвлөжээ. Лот буюу уг бүтээлийн анхны үнийг ойролцоогоор 11,700 фунт стерлинг (15,660 орчим ам.доллар) гэж үнэлсэн байна.
Цахим орчинд уг олдворын зургууд тархсан нь олны дунд ширүүн хэлэлцүүлэг өрнүүллээ. Хэрэглэгчид үүнийг жинхэнэ нууцлаг амьтан гэхээс эхлээд зориудаар хийсэн үзүүллэг гэх мэт олон хувилбар дэвшүүлж байна. Зарим нь иймэрхүү зүйлсийг өнгөрсөн үед шашны зан үйл эсвэл сүм хийд рүү хүмүүсийн анхаарлыг татах зорилгоор хийдэг байсан гэж үзэж байгаа бол, зарим нь ердөө л ховор олдворыг биеэр үзэхийг хүсэж байгаагаа илэрхийлжээ.
