Монгол Улсын Их Хурлын дарга, Монгол Ардын намын дарга Н.Учрал БНХАУ-д 2026 оны 3 дугаар сарын 22-24-ний өдрүүдэд хийсэн айлчлалынхаа үеэр /2026.03.24/ тус улсад суралцаж буй монгол оюутнуудын төлөөлөлтэй уулзлаа. Уулзалтаар төрийн бодлого, хөгжлийн чиг хандлагыг танилцуулж, оюутнуудын санал бодлыг сонссон байна.
Бээжин дэх Монголын оюутны холбооны дарга О.Хүсэлбаатар оюутнуудыг төлөөлөн оролцож, төрийн өндөр түвшний уулзалтыг зохион байгуулсанд талархал илэрхийлэв. Энэ үеэр гадаадад суралцаж буй оюутнуудыг эх орондоо дадлагажуулах “100+100” хөтөлбөрийг хэрэгжүүлэхээр болсныг танилцуулсан юм.
Уулзалтын үеэр Н.Учрал Монгол Улсын хөгжлийн өөрчлөлтийг онцолж, “10 жилийн өмнө Монгол Улсын дотоодын нийт бүтээгдэхүүн 29 их наяд төгрөг байсан бол өнөөдөр 89.9 их наяд төгрөгт хүрсэн” хэмээн дурдсан. Мөн орон даяар авто зам, интернетийн хүртээмж нэмэгдсэнийг онцолж, оюутнуудыг хөгжлийг хөндлөнгөөс дүгнэн, ирээдүйд хувь нэмрээ оруулахыг уриалсан байна.
Тэрбээр оюутнуудад дараах чиглэлд анхаарахыг онцоллоо:
- Шүүмжлэлт сэтгэлгээ, дүн шинжилгээ хийх чадвараа хөгжүүлэх
- Мэдлэгээ бодит хэрэглээ болгох ур чадварыг нэмэгдүүлэх
- Хандлага, сахилга бат, тууштай байдлыг эрхэмлэх
Мөн төрийн үйлчилгээний цахимжилтын хүрээнд E-Mongolia системд оюутнуудад зориулсан “Оюутан” цэсийг танилцуулж, цаашид “E-Student 2.0” платформыг хөгжүүлж байгааг мэдээллээ. Энэхүү систем нь боловсрол, дадлага, хөдөлмөр эрхлэлт, төрийн үйлчилгээний мэдээллийг нэг дор төвлөрүүлэх зорилготой.
Одоогийн байдлаар БНХАУ-д нийт 6300 монгол оюутан суралцаж байгаагаас 40 хувь нь бакалавр, 20 хувь нь магистрын түвшинд боловсрол эзэмшиж байна. Гадаадад суралцагчдад мэдээллийн хүртээмж, дадлага, ажлын байртай холбогдох сувгууд дутмаг байдаг тул шинэ платформ нь энэ асуудлыг шийдвэрлэхэд чиглэж байна.
Түүнчлэн Улсын Их Хурлын Тамгын газраас хийсэн судалгаануудыг parliament.mn болон sudalgaa.gov.mn сайтуудад нээлттэй байршуулсан нь гадаадад суралцагчдад бодлогын мэдээлэл авах чухал эх сурвалж болж байгааг дурдлаа.
