ESL Pro League Season 23 (Counter-Strike 2) тэмцээнд Монголын тамирчин М.Азбаяр “Senzu” олон улсын Passion UA багийн бүрэлдэхүүнд анх удаа тоглож, анхаарал татсан дебют үзүүллээ. Түүний энэхүү оролцоо нь Монголын е-спортын нэр хүндэд шинэ шат нээх боломжтой үйл явдал гэж үнэлэгдэж байна.
2025 оны аравдугаар сард The MongolZ баг Senzu-г үндсэн бүрэлдэхүүнээс гаргасан нь олон нийтийн анхаарлыг татсан. Тэрбээр хоёр жилийн турш өндөр түвшинд тоглож, 2025 оны HLTV Top 20 жагсаалтад Монголчуудаас ганцаараа багтан 13-р байрт бичигдсэн амжилттай байв. Улмаар түр завсарлага авсны дараа баг нь түүнийг трансферын жагсаалтад оруулжээ.
Удалгүй Украйны Passion UA баг түүнийг зээлээр авч, 2026 оны IEM Cologne Major (6-р сарын 2–21)-ын дараа худалдан авах боломж бүхий гэрээ байгуулсан байна. Тус баг нь Украин (Kvem), Өмнөд Африк (JT), АНУ (nicx), Аргентин (try), Монгол (Senzu) гэсэн бүрэлдэхүүнтэйгээр олон улсын баг болон өргөжсөн юм.
Senzu-ийн дебют тоглолт ESL Pro League-д Team Liquid-ийн эсрэг болсон бөгөөд баг нь:
- Dust2 дээр 13:8
- Nuke дээр нэмэлт цагт 19:15
гэсэн харьцаатай ялалт байгуулжээ.
Энэ тоглолтод Senzu 1.31 рейтинг үзүүлж, 48 аллага, 91.7 damage-аар багийнхаа хоёр дахь шилдэг тоглогч болсон байна. Дараагийн тоглолтуудад баг амжилт муутай байсан ч түүний хувь үзүүлэлт тогтвортой өндөр байлаа.
Тухайлбал:
- FUT Esports (1-2): 1.44 рейтинг, KD 63/47, ADR 100.5
- paiN Gaming (1-2): 1.02 рейтинг
- HEROIC (0-2): 0.88 рейтинг
Нийт дөрвөн тоглолтын хоёрт нь багийнхаа шилдэг, үлдсэн хоёрт нь хоёр дахь шилдэг тоглогчоор нэрлэгдэж, дундаж рейтинг 1.18 үзүүлсэн нь багийн бусад тоглогчдоос илт давсан үзүүлэлт болсон байна.
Passion UA багийн нийт амжилт хангалтгүй байсан ч Senzu-ийн хувьд шинэ орчинд богино хугацаанд дасан зохицож, тоглолтын түвшнээ хадгалсан нь онцлох үзүүлэлт боллоо. Мэргэжилтнүүдийн үзэж байгаагаар энэ нь Монголын е-спортын тамирчдад олон улсын тавцанд өрсөлдөх боломж бодитоор байгааг харуулж байна.
