Монгол Улсын Шадар сайдын тушаалаар баталсан журмын дагуу гамшиг, осол, аюулт үзэгдлийн бүсэд эр зориг, мэргэжлийн ур чадвар гарган ажилласан долоон алба хаагчийг шалгаруулж, тус бүр 20 сая төгрөгийн мөнгөн урамшуулал олгох ёслолын ажиллагаа боллоо. Долоо дахь жилдээ зохион байгуулагдаж буй энэхүү арга хэмжээ нь хүний амь нас, эд хөрөнгийг авран хамгаалахад бие сэтгэлээ зориулсан баатруудыг алдаршуулах зорилготой юм.
2025 Оны Онцгой Гавьяатнууд
1. Дэд хурандаа Э.Энхбаяр (НОБГ) Салбартаа 22 дахь жилдээ зүтгэж буй тэрээр “Алтжин”, “Нарантуул”, “УИД” зэрэг түүхэн томоохон гал түймрийн дуудлагуудад ажиллаж, нийт 324 иргэний амийг аварчээ. 2025 онд нийслэлд гарсан 512 удаагийн гал түймрийг удирдлагаар хангаж, 9147 га газрыг галын аюулаас хамгаалсан байна.
2. Ахмад Д.Энхбаатар (Агаараас эрэн хайх, аврах 111 дүгээр анги) Аврах ажиллагааны эмчээр ажиллах хугацаандаа 548 цагийн нислэг үйлдэж, агаарын хөлгөөр тээвэрлэх явцад амь тэнссэн үеийн яаралтай тусламжийг иргэдэд үзүүлсэн. 2025 онд 26 удаагийн дуудлагаар 45 иргэний амийг аварчээ.
3. Ахлах ахлагч Б.Содномцэрэн (НОБГ, 26 дугаар анги) 14 жилийн хугацаанд 119 иргэний амь нас, 3.2 тэрбум төгрөгийн эд хөрөнгийг хамгаалсан. Энэ онд үерийн улмаас тогонд цохиулж, усанд осолдож байсан 2 иргэний амийг аварч, эрсдэлтэй бүсээс 3 иргэнийг аюулгүй шилжүүлсэн байна.
4. Ахлах ахлагч Б.Мөнхнасан (Баянхонгор аймаг, 16 дугаар анги) Салбартаа 15 жил ажиллахдаа 1100 гаруй иргэний амийг авран хамгаалсан. Тэрээр ажилдаа бүтээлчээр хандаж, “Даралтын хоолой угаагч” болон “Зөөврийн хоолой эвхэх” хэрэгслийг өөрийн санаачилгаар зохион бүтээжээ.
5. Ахлах ахлагч Д.Гончигсүрэн (Увс аймгийн ОБГ) Аврагч-усчин тэрээр Увс болон Хяргас нуурт живсэн автомашинуудыг 3-18 метрийн гүнд шумбалт хийж татан гаргасан. Мөн нууранд живж байсан хүүхэд болон 4 иргэнийг шуурхай аварсан гавьяатай.
6. Ахлах ахлагч М.Доржбаяр (Завхан аймаг, Тосонцэнгэл) 12 жил ажиллахдаа 32 иргэний амийг аварсан. Тэрээр амралтын цагаараа голд живж байсан бага насны 2 хүүхдийн амийг аварч, өргөсөн тангарагтаа үнэнч болохоо харуулсан юм.
7. Ахлах ахлагч А.Баярбат (Сэлэнгэ аймаг, 36 дугаар анги) 14 жилийн хугацаанд 1000 гаруй иргэний амь нас, 4 тэрбум төгрөгийн эд хөрөнгийг авран хамгаалсан. 2025 онд Сэлэнгэ аймгийн нутагт гарсан 92 удаагийн ой хээрийн түймрийн голомтод тасралтгүй ажиллажээ.
