АНУ-ын Үндэсний агаар мандал, сансар судлалын захиргааны (NASA) дөрвөн сансрын нисгэгчийг тээвэрлэсэн “Orion” хөлөг бүхий “Space Launch System” (SLS) пуужин сар руу амжилттай хөөрлөө. 1972 оноос хойш хүн төрөлхтний сар руу чиглэсэн анхны жолоодлоотой нислэгийн шууд дамжуулалтыг NASA-гийн албан ёсны цахим хуудсаар үзүүлж байна. “Orion” хөлөг хөөрснөөс хойш найман минутын дараа тойрог замд гарчээ.
Нислэгийг Жон Кеннедийн нэрэмжит Сансрын төвөөс орон нутгийн цагаар 18:35 цагт (Бакугийн цагаар 02:35) үйлдэв. Даалгаврын хүрээнд NASA-гийн сансрын нисгэгч Рид Вайсман, Кристина Күүк, Виктор Гловер болон Канадын нисгэгч Жереми Хансен нар сарны гадаргуу дээр буухгүйгээр тойрон нисэж, эх дэлхийдээ эргэн ирэх юм. Нислэгийн нийт хугацаа 10 хоног үргэлжилнэ.
Пуужин хөөрөхөөс нэг цаг хагасын өмнө нислэгийг зайнаас зогсоох системд саатал гарсан ч инженерүүд шуурхай засварласан байна. Хамгийн сүүлд 1972 оны арванхоёрдугаар сард АНУ-ын “Аполлон-17” экспедицийн хүрээнд хүн сар руу нисэж байсан түүхтэй.
2019 оны хавар NASA “Артемида” (Artemis) хөтөлбөрийг гурван үе шаттайгаар танилцуулсан. Эхний шат (Artemis I) нь “Orion” хөлөг хүнгүйгээр сарыг тойрон ниссэн бөгөөд 2022 оны 11-р сарын 16-наас 12-р сарын 11-ний хооронд амжилттай хэрэгжсэн юм. Хоёр дахь шат (Artemis II) нь энэ удаагийн баг бүрэлдэхүүнтэй нислэг бол гурав дахь шатанд (Artemis III) NASA сансрын нисгэгчдийг сарны гадаргуу дээр буулгахаар зорьж байна.
2025 оны зургадугаар сард АНУ-ын Тээврийн сайд Шон Даффи саран дээр буух ажиллагаа ирэх 3.5 жилийн дотор тохиож магадгүй гэж мэдэгдсэн бол NASA үүнийг 2027 оны дунд үе гэж таамаглаж байсан билээ.
“Orion” хөлөгт холбоо болон ариун цэврийн байгууламжийн асуудал үүсжээ
“Артемида-2” даалгаврын хүрээнд сарыг зорьсон “Orion” хөлөг болон Нислэгийг удирдах төв хоорондын холбоо тасарч, мөн “хог хаягдлын менежментийн систем” буюу ариун цэврийн байгууламжид асуудал гарсан тухай NASA-гийн тэргүүн Жаред Айзекман хөөрсний дараах хэвлэлийн бага хурлын үеэр мэдээллээ.
Түүний хэлснээр, хөлөг болон төв хоорондын холбоо түр хугацаанд тасарсан байна. Удирдах төвийн ажилтнууд нисгэгчдийн дуу хоолойг сонсож чадахгүй байсан ч дэлхийгээс илгээсэн мэдээллүүд тэдэнд хүрч байжээ. Энэхүү саатал нь дохио дамжуулагч хооронд шилжих үед үүссэн байж болзошгүй гэж Айзекман таамаглаж байна.
